SHILLONG: Bristibar salo, Congress dolni dilgipa Highlander Kharmalki aro National People’s Party (NPP)-ni dilgipa Wossaroi Rani, an·tangtangna kam ka·enggipa manderang baksa Bharatiya Janata Party (BJP)-o napangtokaha.
Congress aro NPP-ni membor-rangko rimchaksona tom·aniko ong·atani ja·mano kobor ra·timgipa manderang baksa agangrikengon, Meghalaya a·doko BJP bilakbaroroengani gimin da·o dingtang dingtang dolni membor-rang BJP-ona re·batokengaha ine Meghalaya BJP-ni state president Ernest Mawrie parakataha.
Jaintia Hills, Shillong aro Garo Hills-oba BJP-ni tom·anirangko ong·atna siengkua aro ia tom·anirango gitcham MLA aro MDC-rangba BJP-o napna sienga ineba Mawrie parakataha.
Meghalaya a·dokni BJP dol ning·o ku·mong nangrimani donga ine janapatengon, a·doko namroro silroroaniko nangenggipa manderangna BJP dolmangmangsan ka·dongchakna man·gipa dol ong·engaha ine BJP-ni state president parakataha.
BJP-o napanggipa Kharmalki-ni parakatani gitade, Mawryngkneng-o mamingni gita namroro silroroani dongjaengani giminsa ua BJP dolni ning·o namroro silroroaniko man·na ka·donge da·o BJP-o napangskaaha.
