SHILLONG: Meghalaya a·doko 108 emergency service-ko chalaina dakkianio maming parake dakani dongja aro a·songo ambulance service-ko chalaienggipa dal·dalgipa company-rangkon ra·chakjaha ine dakkianio bak ra·gipa dolrang matnangtokaha.
Meghalaya a·doko Ambulance Service-ko 24 hours Call & Audit Centre gnang Operatioin & Management of Emergency Response Centre (Dial 108)-ko TCIL baksa chalaina EOI-rangko okamahachim ine nikna man·a.
Ia TCIL-ko Meghalaya sorkarini Health department ning·o donggipa National Health Mission songahachim aro da·o TCIL baksa kamko ka·rimnagipa dolrangko seokna sandiskaengachim.
Indake ong·engon, koborko on·ani gitade, ia Emergency Service-ko chalaina gita GVK-EMRI aro Ziqitza Healthcare Limited-ko man·chape gimik dol 9 company-rang dorgastoko galahachim indiba ia dolrangoni dolbongakode sorkari jegalaha.
Jegalako man·gipa mitam company-rangni parakatani gitade, EOI-o pangchake, uamang sorkarina presentation-ko on·na nangachim aro ia presentation-ni krisa uamangna mark-rangko on·achim.
“Indake ong·genchimoba, technical evaluation-ode dakkigipa company-rangoniko presentation-koba ra·jaha aro mark-rangkoba on·jaha indiba dakkigiparangko jegalataiaha,” ine mitam dakkigiparang parakataha.
Iana seokako man·gipa company-rangara, Procreate Techno Systems Pvt Limited, Kubera Solutions Pvt Ltd, Medulance Healthcare Pvt Ltd, Pashupatinath Distributors Pvt Ltd aro Community Action through Motivation Programme (CAMP) ong·aha ineba kobor on·aha.
Iani bidingo sing·sandiaton, mitam dakkigiparang an·tangtangni neng·nikanirangko janapahani gimin talataniko on·china ge·etaha ine Health department-ni official saksa parakataha.
Meghalaya a·doko 108 ambulance-rangko 2008 bilsionin GVK EMRI chalaiengachim indiba ia bilsio GVK EMRI-ni contract-ko sorkari chipatenba gital company-na tender-ko on·skaahachim ine nikna man·a.
