RESUBELPARA: North Garo Hills a·jani Kharkutta constituency-o MLA scheme-ni CGI sheet-rangko man·na gita biming donggipa manderang, ia scheme-ni namgniko man·tokja ine North Garo Hills a·jani Deputy Commissioner-na badi ka·doangaha.
Koborko on·ani gitade, ia scheme-ara Kharkutta MLA Rupert Momin-ni SWRP scheme ong·achim aro iani bidingo songni manderang RTI ka·enba ma·sina man·ahachim.
“Ia scheme-ni CGI sheet-rangko man·na gita chingni bimingrangba dongpaachim indiba chinga mamingkon man·patokjaha. Chingoni saksade bilsignio changgnina kingking biming dongpaachim indiba ua mamingkon man·jaha,” ine Kharkutta jolni manderang parakataha.
Songni manderang skia pora dongpajani gimin sorkari official-rang uamangko cha·bokna man·enga ineba songni manderang suk ong·gijaniko parakattokaha.
Mikkangchi iandakgipa obostarang ong·taijana gita iani bidingo ning·tue sandirokatchina gitaba songni manderang, North Garo Hills a·jani Deputy Commissioner-ko didiataha.
Sal 15-ni gisepon inquiry-ko matchotatchina gitaba songni manderang, Deputy Commissioner-ko didiataha.
Koborko on·ani gitade, ia scheme-ni namgnirangko man·na gita biming dongeba scheme-ni namgniko man·gijagipa mitam manderangni bimingrangara, Hailash Sangma, Menothi Momin, Holsy Sangma, Wither Sangma, Marachina Sangma, Wilnodish Marak, Diana R Sangma aro Grenilla Marak ong·achim.
