SHILLONG: Bharatiya Janata Party (BJP) baksa bakrime kam ka·enga ine matnanganiko National People’s Party (NPP)-ni dilgiparang jegalatenba, ia election-oba dolgnian, pilak constituency-rangon dolsa dolgipin baksa susagrikenga ine parakataha.
BJP baksa bakrime kam ka·enga ine matnanganiko jegalatengon, a·dokni Chief Minister Conrad Sangma-ni South Tura constituency-oba BJP dolan mongsonggipa bobil gita ong·e susagrikenga ine NPP-ni ku·wattimgipa Ampareen Lyngdoh parakataha.
“Election-ni somoiode pangnan political dolrangni gisepo matnanggrikanirang dongaigen aro NPP-ko BJP baksa bakrime kam ka·enga ine TMC-ni matnanganiara gisik sokgija aganani gitasa ong·enga. Constituency ge·antion, NPP-ni bilakgipa candidate-rang donga ong·ode uano BJP-ni candidate-rangba dongaigen,” ine Lyngdoh parakataha.
Re·anggipa Mongolbar salosan, Kristianrangni kosako ong·gija dakgipa kamrangna Meghalaya TMC-ni vice president George B Lyngdoh, BJP-ko matnangatenba, NPP-koba BJP baksa bakrime kam ka·enga ine matnangatahachim.
Indake ong·engon, election-na skangde pangnan political dolrang, dolsa dolgipinko iandake jaksi ote matnangronga ine NPP-ni dilgipa parakatskaaha.
“Badiaba biaprango torom nitee badiaba jatrangni kosako ong·gija dakenga ong·ode uandakgipa kamrangko jegalna nangchongmota. Indiba iandakgipa matnanganirangna chu·onga gita sakkirang donggenchimode, iandakgipa kamrangko sandirokatna nanga,” ine Lyngdoh aganaha.
BJP baksa NPP bakrimenga ong·ode maini gimin pilak constituency-rangon dolgnini gisepo candidate-rangko susagrikatenga ineba ua sing·doangaha.
“Chief Minister-ni constituency-ko niate nibo, ia constituency-o chief minister baksa susagrikenggipa mongsonggipa candidate-ara BJP-onin ong·a,” ine Lyngdoh aganaha.