SHILLONG: Da·o ong·enggipa Meghalaya a·dokni sakbonga MLA-rangko, Budbar salo United Democratic Party (UDP)-o rimnapgen ine Sombar salo, UDP-ni president aro Assembly-ni Speaker Metbah Lyngdoh parakataha.
UDP-o napangna sienggipa sakbonga MLA-rangara, Mawlai-ni gitcham Congress MLA PT Sawkmie, Nongpoh-ni gitcham Congress MLA Mayralborn Syiem, Sutnga-Saipung-ni Trinamool Congress (TMC) MLA Shitlang Pale, Mawkyrwat-ni HSPDP MLA Renikton L Tongkhar aro Nongkrem-ni Independent MLA Lambor Malngiang ong·a.
Ia sakbonga MLA-rang, UDP-o napna skang, Budbar pringo, Assembly-o membor ong·aniko watnaba gnang.
Iani bidingo kobor ra·timgiparangna u·iatengon, UDP-ni gittamgipa candidate list-ko parakna skang UDP-ni state election committee (SEC) tom·e chanchirimanggen aro ia gittamgipa candidate list-ko Budbar salon parakatgen ine Sombar salo UDP-ni president Metbah Lyngdoh parakataha.
Lyngdoh-ni parakatani gitade, Budbar salo rimnapako man·na sienggipa sakbonga MLA-rangkoba UDP-ni gittamgipa candidate list-o man·chapatgen.
Da·o dipet a·dokni dam 15 constituency-rangna candidate-rangko man·dapaha ineba UDP-ni president parakataha.
Da·o dipet Garo Hills-ni damsku constituency-rangko man·chape gimik dam 34 constituency-rangna UDP-ni candidate-rangko parakatmanaha ineba Lyngdoh parakataha.
