TURA: Mongolbar salo, All India Trinamool Congress (AITC) Parliamentary Party-ni dilgipa aro Rajya Sabha-ni MP Derek O’Brien, Tura Don Bosco Higher Secondary School-o poraienggipa chatro chatrirang baksa agangrikangenba, an·tangtangni janggi tanganio chu·sokgiparang ong·na gita bimchipe poraichina chatro chatrirangko didiangaha.
Ia tom·anio sak 1200-na baten chatro chatrirang bakko ra·angaha aro tom·anio ua chatro chatrirang baksa agangrikengon, chu·sokgipa ong·na ua mairangko dakahachim, uarangkoba chatro chatrirangna agane on·angaha.
“Na·simang janggi tanganio chu·sokgiparang ong·na sikbebeenga ong·ode, chu·sokgijanikoba cha·tote nigiparang ong·na nanga,” ine AITC-ni MP aganaha.
Chu·sokgipa ong·na kamko ka·anio, bimchipani, ka·dongani, sengnapani aro gisik on·aniko nangan baksana chu·sokgijanirangko maikai chagrongna nanga, uko name ma·sie ra·giparang ong·na nanga ineba ua chatro chatrirangna ku·pattianiko on·angaha.
Ia program-ko ong·atanio chatro chatrirangba, an·tangtangni u·i-ma·sie ra·na nanganirangko Derek-o sing·e sanne ra·na cholrangkoba man·aha.
Skulona re·bae chatro chatrirangna an·tangni gamchatbegipa agan-ku·pattianirangko on·ahani gimin skulni Father Andreas Panna-ba AITC-ni MP-ko mittelpilangskaaha.
“Ia salni bako MP-ko grongna man·aniara chingna aro chatro chatrirangna nambegipa chol ong·aha,” ine Father Panna parakataha.
