SHILLONG: Meghalaya Legislative Assembly election-ko re·baenggipa February jani 27 tariko ong·atgen ine Budbar salo, Election Commission of India (ECI) parakataha.
ECI-oni u·iatani gitade, Meghalaya Assembly election-ko February 27 tariko ong·atenba, result-ko March-ni 2 tariko parakatskagen.
Meghalaya Assembly election-na gazette notification-ko on·ani tarikara January 31 tarik ong·gen, nomination-rangko file ka·ani bon·kamgipa tarikara February-ni 7 tarik ong·gen aro nomination-rangko nipilani tarikara February 8 ong·gen.
Meghalaya Assembly election-ko ong·atani tarikko ECI parakatmanahani gimin a·doko joljolan Model Code of Conduct (MCC)-koba ra·gatangskaaha.
Meghalaya Assembly-na dongimin bilsi bongani term, re·baenggipa March jani 15 tariko bon·engahachim aro dongimin niam gitade, gital Assembly-ko term bon·na skangan songna nangengachim.
Ia bilsio Meghalaya a·dok baksana salgro salaram jolo Nagaland aro Tripura a·dokrangoba Assembly election-ko ong·atengachim aro ia apsan salon ia a·dok damgnini Assembly election-ko ong·atani tarikrangkoba ECI parakatjolaha.
ECI-oni u·iatani gitade, Nagaland a·dokoba election-ko February 27 tarikon ong·atgen aro Tripura-ode Assembly election-ko February 16 tarikon ong·atangskagen. Result-kode damgittam a·dokrangon March-ni 2 tariko parakskagen.
