SHILLONG: All India Trinamool Congress (AITC)-ni Meghalaya a·dokni manderangna ku·rachakenggipa ‘WE Card’ aro ‘MYE Card’ scheme-rangara ‘bakki’ card-rangsa ong·aia ine Budbar attamo National People’s Party (NPP) matnangatenba, ia scheme-rangko Meghalaya a·dokona ra·babebegenchimode West Bengal a·doko gitan Meghalaya a·dokba gro jinang donggipa a·dok ong·gen ine parakataha.
NPP-ko dilenggipa manderangni parakatani gitade, AITC dolni da·o Meghalaya a·dokni manderangna ku·rachakenggipa ‘WE Card’ scheme-ara West Bengal sorkarini ra·gatgipa ‘Lakshmi Bhandar’ scheme-sa ong·achim aro ia scheme-ko ra·gatani a·selan West Bengal sorkari, 2022-23 bilsio mande sakprako gong 59,000-mangni gita gro nangahachim.
Ia scheme-ni a·selan West Bengal sorkari, an·tangni tangka ra·srogiparangna bilsio gong kror 80,000-oni gong kror 90,000-mangko sud baksa gamna nangenga aro West Bengal-ni mande sakantian bilsio gong 8000-ko gro gita gamna nangskaenga ineba NPP-ni dilgiparang parakatenba, West Bengal a·dokon indita grorang nangenga ong·ode bani tangkachi ia scheme-ko Meghalaya a·dokona ra·bana miksongenga ine sing·doataha.
Budbar salo, All India Trinamool Congress (AITC)-ni chairperson aro West Bengal-ni chief minister Mamata Banerjee-ni North Garo Hills-ona re·bae, manderangna ku·mikchetanggipa kattarangara da·o election-na dakmikanisan ong·aia aro ua manderangna lekkachi ba bostuchiba manderangna ku·mikchetaniko on·na man·jaha ineba NPP matnangataha.