TURA: Meghalaya a·doko Jal Jeevan Mission (JJM)-ni kamrangko chu·sokatengani gimin gittamgipa changna award-ko man·na sienga ine a·dok sorkari a·kangatahaoba, mitam songrangode kamrangko ka·ani namjani a·selan songni manderang chirangko man·tokkujaenga ine koborko man·soaha.
Ia songbadna kobor on·timgipa mande saksani parakatani gitade, adita salrangna skang ua North Garo Hills a·jao diltubatsranggipa songrangoni Ildek Akong aro Tingbagittim songrangona re·ange nion, ia songrango JJM-ni kamrangko matchotaoni songni manderang da·onan chi tingtotsakoba man·kujaenga ine nikna man·aha.
Ildek Akong songo songdongenggipa manderangni u·iatani gitade, ia songo te 130-mangni gita nokdangrang donga indiba ia songna JJM-ni kamrangko chu·sokatani namsrangjani a·selan songni manderang ia scheme-ni chirangko jakkalna man·tokjaengachim.
“Chingni songona chiko salbana gita bang·en cholrang dongachim indiba ia scheme-ko jako ra·e kam ka·enggipa contractor, chonbegipa nalaonikosa chiko salbaaha aro ia chiara namen mitchiani gimin matburingrangba ringna krajachim. Ia neng·nikanirangko namatgen ine ua chingna aganronga indiba da·onan uan apsanbaibai ong·aienga,” ine songni mande saksa parakataha.
Ia scheme-na jakkalenggipa mongsonggipa tengkikoba rongsa nongdapaiaha aro ia tengkiona chian jokbajaenga ineba kobor on·timgiparang parakataha.
Ia Ildek Akong JJM project-ara baridapatgipa project ong·e iana gong lak 78.374 tangkarangko koros ka·ahachim aro ua biapo see donani gitade, ia project-ko saksa Gollam Rabbani Mondal minggipa contractor-na on·ahachim.
“JJM-ko ra·bana skangan chinga chu·onga gita chirangko man·achim indiba ia scheme-ko ra·gatani ja·mande chi tingtotsakoba man·skakujaenga. Chinga chingni pilak kamrangnan Ildek chiringo pangchakgiparang ong·a. JJM-ni namgnirangko man·jaengani gimin chinga baditaba chang department-na badi ka·ahachim indiba maming aganchakanirangko man·kujaenga,” ine songni manderang parakataha.
Iani bidingo sing·sandiaton, badi ka·anirangko man·soahani gimin department-ni manderang songona re·ange am·sandianiranko dakeaha aro chiko salbaenggipa mongsonggipa pipe-an block ong·ani a·selsa songni manderangona chi jokangjaenga ine ma·sina man·aha ine PHE department-ni JE saksa parakataha.
Songni manderangna rongtalgipa chirangko sale on·na uamang kamko ka·engaha ineba PHE official parakataha.