SHILLONG: Re·baenggipa February jani 27 tariko ong·atna sienggipa Meghalaya Legislative Assembly election-o Bharatiya Janata Party (BJP), a·dok gimikni dam 60 constituency-rangon susana miksongenga aro ia dam 60 constituency-rangoni komibeoba dam 10-oni dam 15 seat-rangkode chena ka·dongenga ine Bristibar salo, Meghalaya BJP-ni state president Ernest Mawrie parakataha.
Mawrie-ni parakatani gitade, ia dam 10-oni dam 15 constituency-rangde BJP-ni chena miksonge susaenggipa constituency-rangan ong·a aro ia seat-rangkode uamang chetelna ka·dongenga.
“Chinga iana bateba chenade ka·dongsoenga indiba BJP-ni survey ka·anio dam 10-oni dam 15 seat-rangko chena cholrangko nikbatengani gimin chinga chingni survey ka·ani gitaba apsan ong·na nangenga,” ine BJP-ni state president parakataha.
Iako parakatengon uamang songbadrango senamangmang ba lekkanamangmangsan dakenga ong·ja indiba iako central committee-ni tom·anionaba ra·angahani gimin ian kakketan ong·enga ineba Mawrie parakataha.
Indake ong·engon, West Bengal a·dokon All India Trinamool Congress (AITC) dol chu·sokgipa ong·na man·jahaoba Meghalaya a·dokona re·bae manderangna dal·a dal·a kattarangko aganna jotton ka·enga ineba BJP-ni state president matnangataha.
“Na·simang West Bengal a·dokona re·ange nigenchimode uano mai ong·enga uko nikna man·gen. West Bengal a·doko Trinamool Congress sorkari chu·sokgipa ong·jaengani a·selan mamingni gita namroro silroroani dongjaenga,” ine Mawrie parakataha.
Ia 2023 bilsini July jao West Bengal a·doko ong·atna sienggipa panchayat election-oba BJP-an chegopgipa ong·gen ineba ua parakataha.
Meghalaya a·dokni manderangna AITC dolmangmangsan namgipa sorkariko rike on·na man·gen ine AITC-ni chairperson aro West Bengal a·dokni chief minister Mamata Banerjee-ni agangipa kattarangko jegalatengon, manderang pilakni gita nigopate nigenchimode West Bengal a·doko AITC sorkarini chu·sokgijaniko nikna man·gen ine Mawrie parakataha.
AITC-ni ‘WE Card’ scheme-ara, Meghalaya a·dokni manderangna AITC-ni election-na ku·mikchetmikgipa kamsan ong·aia ineba ua matnangataha.
