SHILLONG: Adita salrangna skang, West Bengal-ni chief minister aro Trinamool Congress (TMC)-ni chairperson Mamata Banerjee-ni North Garo Hills a·jaona re·baanio bakko ra·anggipa manderangoni 50 percent-de Assam a·dokonisa ong·a ine National People’s Party (NPP) matnangataha.
Banerjee-ni North Garo Hills-ona re·baanio hajalni hajal manderang, Dilma A·pal kal·chakramo tom·chimongtokaha aro ia tom·anio komibeoba sak 30,000-na baten manderang sokbatokaha ine kobor on·ahachim.
Indake ong·genchimoba, ia tom·bimonganio bakko ra·giparangara gimikande Meghalaya a·dokni ong·ja aro 50 percent-mangni gitade Assam-onikosa rimbatokaha ine NPP-ni dilgiparang parakatskaaha.
Meghalaya a·dokona baditaba chang re·baani ja·manoba TMC-ni dilgipa Banerjee, Meghalaya a·doko songdongenggipa Tribal jatrangni gimin ma·sikuja ineba NPP matnangataha.
“Tom·bimonganio bak ra·giparangoni 50 percent-de Assam-onisa ong·a aro ua (Mamata) da·onan Meghalaya a·doko songdongenggipa Tribal-rangni gimin aro biaprangni gimin ma·sikuja,” ine NPP-ni ku·wattimgipa aro Williamnagar-ni MLA Marcuise N Marak parakataha.
Dilgiparang an·tangtangan a·dokni manderangni gimin ma·sikujaengon, a·doko chena man·gen ine ka·donganiara TMC-ni goka ong·aniko mesokanisa ong·a ineba ua parakataha.
Banerjee-ni Garo Hills-ona re·bae jinma tom·aniko ong·ataniara maming nangchakeaniko ra·bajawa ine janapatengon, “Ia changode NPP, bang·bata seat-rangkon chegen maina chinga chingni ku·rachakanirangko chu·sokatna man·aha. FOCUS aro FOCUS Plus-rang gita dakgipa scheme-rangchi chinga manderangni janggi tanganiko tang·doatna man·aha aro Aspire gita dakgipa program-rangchi chinga a·dokni chadamberango change sapanirangko ong·katatna man·aha,” ine Marak aganaha.
Ia chang election-o Mukul Sangma-ni seat damgnio susaengani giminba ua matnangataha. “Ian una kenna nanganisa ong·engaha maina ua seat damgnioni susae seat damgnion chegenchimoba, damsakode wattelna nangaigen aro ian constituency-ni manderangko togia gitasa ong·gen,” ine NPP-ni dilgipa parakataha.
Ia chang Assembly election-o Mukul Sangma, Songsak aro Tikrikilla constituency-oni susataiengachim ine nikna man·a.
2018 bilsini Assembly election-oba ua Songsak aro Ampati constituency-oni susae chegipa ong·ani ja·man Ampati constituency-kode an·tangni demechik Miani D Shira-na wate on·skaahachim