SHILLONG: Ia 2023 bilsini Assembly election-o skanggipa changna susaenggipa Voice of the People’s Party (VPP)-ni noksa (symbol)-ko da·al Sonibar salni bako parakatgen.
Sonibar salo, VPP-ni tom·bimonganiko Nongkrem constituency-ni Smit songo ong·atengani gimin ia tom·anio VPP-ni noksako oprakenba jinmana parakatgen ine VPP-ni dilgiparang u·iataha.
Ia noksako Election Commission, re·baenggipa February-ni 27 tariko ong·atenggipa Assembly election-o bak ra·pana man·na gita VPP-na on·angahachim.
Da·o dipet VPP-ko state party ine recognize ka·kujaengoba party-ko Election Commission-o segatmanahachim.
State party ine recognize ka·ako man·na gita aro dongkamnagipa noksako man·na gita ia dol, election-o komibeoba 6 percent vote-rangko man·e komibeoba seat damgniko chena ba komibeoba 3 percent vote-rangko man·e komibeoba seat damgittamko cheskana nangengachim.
Ia Assembly election-na VPP-ni sak 16 candidate-rangko adita salrangna skangsan parakatmanahachim aro ia sak 16 candidate-rangoni VPP-ni president aro gitcham MLA Ardent Basaiawmoit baksana da·o ong·enggipa MLA Adelbert Nongrum-ba candidate ong·engachim.
Ia Assembly election-o VPP-ni president Ardent Basaiawmoit, Nongkrem constituency-oni aro Adelbert Nongrum, North Shillong constituency-oni susaangskana siengachim.
