Assembly election-na NPP-ni campaign ka·aniko ‘Chenanggre’-oni a·bachengata

TURA: Re·baenggipa February 27 tariko ong·atna sienggipa Meghalaya Assembly election-na National People’s Party (NPP)-ni campaign ka·aniko Sombar salo, North Garo Hills a·jani ‘Chenanggre’ ba Adokgre songoni a·bachengataha.
NPP-ko bikotdilchenggipa Purno A Sangma sagini somoionin election-na campaign ka·aniko Adokgre songonin a·bachengatrongachim aro uni election-na campaign ka·aniko ia songoni a·bachengata changantian ua chegipa ong·rongahani gimin ia songko ua ‘Chenanggre’ ine minge donangahachim. PA Sangma sagini ja·kuko ja·rikpaani gita uni depante aro NPP-ni national president Conrad K Sangma-ba da·o election changantian ia songonin campaign ka·aniko a·bachengatskaengahachim.
Ia tom·bimonganiko, adita salrangna skang kulie on·anggipa Chenanggre Stadium-on ong·ataha aro ia tom·bimonganio NPP-na chakpaenggipa sak 10,000-na baten manderang tom·chimongtokaha.
Ia tom·bimonganiko ong·atanio Garo Hills gimikonin NPP-ni candidate-rang bakko ra·angtokaha aro uamang baksana a·dokni Deputy Chief Minister Prestone Tynsong, NPP-ni dilgipa Ampareen Lyngdoh, James Sangma aro dingtang dingtang dilgiparangba bakko ra·angtokaha.
Ia tom·bimonganio NPP-ni national president Conrad Sangma, jinmana aganprakangengon, West Bengal election-o jekai TMC, BJP-ko gipin biapni party ine matnangahachim apsan daken, TMC-ko gipin biaponi re·bagipa political dolsa ong·a aro gipin biaponi re·bagipa dolko Meghalaya a·dokni manderang ra·chakna man·jawa ine parakatskaaha.
“TMC-ni dilgipa Mamata Banerjee skango, angni pagipa PA Sangma sagiko mande ra·bee chakpaanirangko on·ahani gimin anga an·tangba uko mande ra·a indiba politics-ni gitade TMC-ara Meghalaya a·doko gitalsa ong·kuengani gimin Meghalaya a·doko uamang biapko man·na somoiko nangkugen,” ine Sangma aganaha.
Sangma-ni parakatani gitade, Meghalaya a·doko da·o TMC-ko dilenggiparang pilakan Congress dolni gitcham dilgiparangsa ong·e ua somoion Meghalaya a·doko namroro silroroaniko ra·bana cholko man·achim indiba uamang kamko ka·anio chu·sokgiparang ong·na man·jahachim.
TMC-ni ku·rachakenggipa ‘WE Card’ aro ‘MYE Card’ scheme-rangni gimin janapatengon, ia scheme-rangara uamangni ku·sikmangmangchi ku·rachakanisan ong·aia indiba ia sorkaride FOCUS, FOCUS+, YESS aro uandakgipa program-rangchi manderangna dakchakanirangko on·na man·aha ine Sangma parakataha.
NPP-ni election campaign-ko a·bachengatanio jinmana aganprakanggipa gipin manderangara, NPP-ni national vice president Prestone Tynsong, Tura-ni MP Agatha K Sangma, Kharkutta-ni MLA Rupert Momin, Songsak-ni gitcham MLA Nihim D Shira, Mendipathar-ni gitcham TMC MLA Marthon Sangma, Siju-Rongara-ni MLA Rakkam A Sangma aro gipinrang ong·a.