SHILLONG: Bangladesh-oni niam gri ma·brangbagiparangko a·doko gapatna TMC-ni namgija dakaoniko Meghalaya-ko jokatgen ine NPP-ni aganani salsa ja·mano uamangan Bangladesh-nirangni namgnina Citizenship Amendment Act-na chakpaenga ine a·dokni TMC, NPP-ko matnangdoatskaaha.
TMC-ni kosako uamangni miksonggipa kamna NPP aro BJP-ko matnange, Chief Minister Conrad K Sangma-ni party CAA-na chakpae a·bri jatni manderangko mitchiaha uko Meghalaya TMC-ni youth president Fernandez S Dkhar janape aganaha.
“2019 bilsio Bangladesh-nirangko namnikgipa CAA-ko chakpae uamang chingko mitchiaha. Je act-an a·bri jat manderangni kosako namgijani ong·engachim uni kosako West Bengal-o, chingni chairperson Mamata Banerjee dal·begipa jegalaniko dakdilaha. Ia apsan kamko Bangladesh-nirangni namgnina chinga donga ine NPP-ni a·kanganiko nikna man·enga,” ua aganaha.
NPP, Bangladesh-nirangni namgnina dakenga ine nikna man·enga maina CAA-ni miksong-chanchiani gimikan Bangladesh-oni aro gipin songsul a·songrangoni a·rikako man·gipa bang·pagijagipa jat manderangko India-ona rimbaani ong·enga, Dkhar aganaha. “Ian TMC ong·ja indiba NPP-sa CAA-ko chakpae puonaha,” ua aganaha.
BJP aro NPP dolgnian Meghalya-o apsan ong·enga, ua aganaha.
Lekka-porani a·bao neng·nikanirangko namatna man·gijanina NPP-chi dilenggipa a·dok sorkariko Dkhar matnangaha. “Double-engine sorkarini bidingo MDA aganenga indiba SSA skigiparangni dormaharangko bariatna gita amjaenga,” ua aganaha.
“BJP aro NPP namroro-silroroaniko ra·bana minggipin cholko aganengako dontongna nanga. Uamango bilsi bonga bilsirang dongaha indiba mamingkon dakna man·jaha,” ua aganaha.
Ku·rachakako chu·sokatna BJP-ni man·gijanina matnange, ‘‘Bil-sasonko man·a skang, PM Narendra Modi a·songna kror gni kamrangko on·a ku·rachakaha. Bilsi 10 ong·nasipilengjok indiba an·chingni chadamberang kam man·gija dongkuenga. Chingni ku·rachakani MP Modi-ni ku·rachakani ong·ja. Chinga chingni ku·rachakanirangko chu·sokatgen. Sorkariko rikani antignini gisepo chingni dilgiparangni ku·rachaka gita chinga WE Card scheme-ko kam ka·gnok,” Dkhar aganaha.
Dkhar, jean Rambrai-Jyrngam constituency-oni TMC candidate ong·enga, “Ua scheme-rangni ning·o chingni me·chikrang aro chadamberangna chinga tangka-paisani gita dakchakode chinga a·dokko palna nanggen ine mitam NPP dilgiparang aganaha. Indiba TMC, NPP ba BJP gita ong·ja, uamang sima-ari mamlani bidingo jeko uamang dakaha ua gita chinga chingni a·dokko paljawa,’’ Dkhar aganaha.
