SHILLONG: NPP-ni agantimgipa Dr M Ampareen Lyngdoh-ni aganani gitade, AITC Meghalaya-na aro uni manderangna nama kamrangko ka·ana bate, BJP-ko matnange agananirangko dakna gisik on·bata. Ua indineba aganaha je, “Meghalayao cheaniara TMC-ni a·song gimiko dakna miksonganirangna ja·ku de·anisan ong·aia”. TMCko Salgro-Salaramni ku·rang ine aganna man·ja maina uamang Meghalaya-komangba u·ija. Jekai, bakki card-rangchi Kror 3000 tangkarangko dingtang dingtang kamrangna sualatna ku·chakaniara pension-rang aro dormaha gamanirangko dontongatjaskalde ong·na amgijani ong·a maina an·chingni namroro-silroroanina nanggipa korosrang Kror 4000 ong·a, Lyngdoh aganaha.
TMCni me·chikrangni janggi tanganiko namdapatna krenge miksonganiara a·doko da·o ong·enggipa obostarangko nigija chanchininggija tariani ong·a ineba Dr M Ampareen Lyngdoh agandapaha. Uamang bilsiprako ge 1,200 SHG-rangko bikotna gita scheme-rangko a·bachengatna miksonganirang donga, indiba an·chingni sorkarian batanggimin bilsi 5-o ge 7,500 SHG-rangko bilsiprako bikotna man·aha, uandake iarangchin uamang an¢chingni a·doko namroro-silroroanirangni gimin u·ija ine namen nikna gita man·enga. Dr. Mukul ia obostarangni bidingo changsaba janapani dongja, aro iara party-ni dal·giparang baksa meli-nangrime chanchirime agangrikani dongjani a·sel ong·naba gnang, ua aganaha.
Adita salrangna skang, Bengalo a·dokko chalaienggipa official-rang, namroro-silroroanina tikatgimin tangkarangko bi·anina Mamata Banerjee-ni manengako video-o nikaha, jeon ua Kror 1.6-na bate Bengal-ni me·chikrangni scheme-na sualani ja·manode tangkarang dongjaha ine janapaha. Ia apsan obostaan Meghalayaoba ong·nasienga, Lyngdoh aganaha.
Name chanchisamsoani gri kamrangko ka·ode, Meghalayako ia scheme-rang bilsi 30-rang ja·manchakatgen, ua aganaha.
West Bengalo, skigiparang aro kam ka·giparang DA-na sorkarini kosako jegalanirangko aro national standard-ni gita dormahako on·china dabianirangko dakenga. High Court-ni gitaba a·dok sorkariko tangka gamanirangko dakchina hukumko on·ahachim, indiba uamangni sorkari da·onaba uko dakkuja. West Bengalni skotong minister cholgri-apgri aro galchipako man·gipa a·dokni manderangni janggi tanganirangko tang·doatna dingtang dingtang project-rangchi krenge kamko ka·enga aro iani a·selsa gamanirang ja·manchakenga inesa uamang aganchakaniko on·aha. Meghalayao apsandakgipa obosta ong·genchimoba baditan neng·nikanirangko man·genchim ineba ua aganaha.
Da·o TMC-ni basegimin dilgiparang uamangni skango bilsi chetna sasono ong·mitingo nanga gita namroro-silroroaniko ra·bana man·jaha aro da·o tusiaoni chakatpilaha gita chacha Bengalni scheme-rangko gipatna jotton ka·enga. Ia apsan dilgiparangan Meghalaya-ko an·seng-baljokanio, skia-porao, janggi tangani gadango aro gipinrango namen tang·onataha. SHG-ni dilenggipa janggi tangani cholrangko niatgenchimode, 2018 bilsiona kingkingde ge 5,000 SHG-rangkosan bikotkuaingachim. Bilsi 5-o, sasono ong·anggipa sorkari SHG-rangko ge 43,000-ona bariataha. Uni aganani gitade, Meghalayao nambatgipa gadango silroro-namroroanirangko nikna man·enga, aro Meghalayani manderang Pa PA Sangma sagio aro uni kamrango ka·donganirang dongangkugen. Meghalaya-ko nambatgipa ong·atna gita NPP namen krenge kamrangko ka·angkugen.
Skotong Minister Conrad K Sangma adita salrangna skang AITC-ko a·dokoni party ong·ja ine aganaha. Unomitingo adita salrangna skang Banjop Pyngrope-ba AITC-ko “Bangla Party” ine aganahachim.
