SHILLONG: TMC dilgipa Mukul Sangma-ni pangnajol bilake ga·chatgipa Ampatio, NPP national president aro Chief Minister Conrad K Sangma mija Mongolbaro NPP-ni bilko mesokeaha.
Chief minister Conrad Sangma bike-o constituency-on, sak 2,000 mang bike salgiparang baksa napeaha aro TMC-ni lak 2 kamrangko nakatatgen ine ku·rachakgipana bate dingtang dingtang entrepreneurship programrangchi lak 5 kamrangko nakatatgen ine ku·rachakbaaha.
Ampati-o election campaign ong·atgipao jinmana aganprakengon, bading-chiwalani a·barango lak 5 kamrangko nakatatgen ine CM ka·dongatani kattarangko ku·rachakbaaha.
NPP-ni re·dilgipa sorkari, batanggimin bilsi bonga somoio chadamberangna namgni ong·gipa dingtang dingtang kamrangko a·bachengataha. Uarangoni minggnide tangka-paisachi dakchakaniko on·gipa PRIME aro bading-chiwalani a·bao skie on·ani programrangko a·bachengatanian ong·a·a ine CM aganaha.
“Chingni party, chadamberangni namgnina kam ka·na kang·kare kamanaha. PRIME gita dakgipa programrangchi, Meghalayao bading-chiwalani a·bako chinga tang·doataha,” Sangma aganaha.
ASPIRE Meghalaya aro YESS Meghalaya dakgipa programrangchi NPP, a·dokni chadamberangko saldoaha ineba ua aganaha.
Ua indake agandapaha je, A·dokni chadamberangko kal·susaani, doka-dam·ani gipin co-curricular activity-rango chadamberangko gisiko nangbatatna gita NPP kamrangko ka·angkugen. “A·dokni manderang chingna bilko on·ode chadamberangko bilakatna kamko ka·angkugen,” Sangma ku·rachakaha.
Batanggimin 2018-ni obostarangko janape aganengon, NPP, South West Garo Hills-ni ge·sa seat-koba chejaha, Opposition-rangsa gimikkon cheaha, unigiminsa Sorkari ia a·jao namdapatani kamrangko ka·na man·jaha, maina pilak MLA-rangan Sorkari baksa bakrimja, CM aganaha.
NPP, a·doko bang·bata seat-rangko chenasienga aro iano South West Garo Hills, chingni party baksa bakrimode namgniko man·gen, Sangma a·kange aganaha. “Sason ka·gipa dolo MLA dongosan pangnan nambatgipade ong·aia” ineba ua aganaha.
TMC-de bak ong·gimin nokdangsa ine aganengon, West Bengal-ni party-sa, uamangni re·mikkang maming dongja ine nikenba TMC-na bang·a chakgiparangan NPP-ona katnaptokengaha ineba CM aganaha.
Mongolbarni election rally-o TMC-ni bang·a memborrang NPP-o napangaha aro South West Garo Hills-o susatokenggipa Stevie Marak, Subir Marak, Sanjay A Sangma aro Ian Botham K Sangma, ia NPP candidate-rangna chakpatokchina gitaba Pa Sangma manderangko mol·molaha.
CM-ni election rally-o sak 7,000-na batpilgipa manderang bakko ra·aha.
