SHILLONG: 2021 bilsini August jao HNLC bobil dolni gitcham general secretary Cheristerfield Thangkhiew-ko so·otanio jak donggipa apsan police officer-rangan uko rim·na chalakki dakanioba jak donga ine Mongolbar salo, Meghalaya Police-ni gitcham assistant inspector general (AIG) GK Iangrai, Shillong District Jail-oni jakgitel watpilako man·ani ja·man, kobor ra·timgiparangna aganenba, iani a·selan una aro uni nokdangnaba kenchakna nangani ong·enga ine parakataha.
“Anga angni chanchisokgijagipa gadango matnangako man·e rim·ako man·gipa ong·a. Angko ia kamo matnange rim·anio badia political dolrang, political agent-rang ba bobil dolrang jak donga anga ma·sija,” ine Iangrai aganaha.
Ua an·tangde kamtango bimchipani gimin aro kakket ong·e kamko ka·ani giminsa medal-rangko man·aha indiba Police department-o mitam police officer-rangde dosgri manderangko so·otani ja·manoba medal-rangko man·skaaha ineba Iangrai, suk ong·gijaniko parakataha.
“Angni jakrang rongtalgipa ong·a aro angni jako dosgrirangni an·chirang dongja. A·songni ainko chalaianio anga chu·gimik bebera·gipa ong·a aro angni janggi bon·kujaskal anga kakket bichalna dakgrikangkugen,” ine gitcham AIG parakataha.
Uni kosako matnanganirang donggenchimoba ua dosgri ong·ani a·sel da·o jakgitel watako man·aha indiba uko police-rangni ning·o donengmiting somoio una on·gimin bilrangko pe·aha ineba Iangrai parakataha.
Shillong songjinmani Sadar Police Station-o National Emergency Response System (NERS) Public Safety Answering Point (PSAP) facility-ko rikna sorkarini chamatgipa tangka paisarangko jakkalsreta ine matnange, re·anggipa October 28 tariko saksa Darwin Sangma minggipa mandeni CID-na FIR ka·ani ja·man Iangrai-ko November 2 tariko rim·ahachim ine nikna man·a.
Indake ong·engon police department-o ong·gija dakgipa manderang bang·en donga aro gipinrangni ong·gija kamrangna ukosa matnange rim·aha ine gitcham AIG parakataha.
Iani bidingo ua bang·en RTI-rangkoba ka·aha aro ia RTI-rangan police department-o ong·gija dakanirangko parakgen ineba Iangrai parakataha.
