SHILLONG: West Garo Hills a·jani Rajabala Assembly Constituency-o Trinamool Congress (TMC)-ni candidate Mizanur Rahman Kazi, 10 vote-mangmangchi National People’s Party (NPP)-ni candidate Abdus Saleh-ko cheangna gita man·aha.
Ia election-o cheani ja·man kobor ra·timgipa manderang baksa agangrikengon, ia election-o uko seokahani gimin ua an·tangni kusi ong·aniko parakatenba, Rajabala constituency-ni manderangkoba mittelpilangaha.
“Anga namen kusi ong·bea aro manderangba namen kusi ong·enga. Ia chango Rajabala-ni manderang an·tangtangni depantekon seokaha. Ia election-o angko seokahani gimin re·baenggipa salrango Rajabala-ni manderang bang·en dingtanganiko nikna man·gnok aro iako anga Rajabala constituency-ni manderangna ku·rachakenga,” ine Kazi parakataha.
Election-ni result-ko dingtangatna gita NPP-ni manderang jotton ka·ahachim indiba kakketan chegipa ong·aha ineba gital TMC MLA parakataha.
“Uamang (NPP) dingtang dingtang cholrangchi election-ni result-ko dingtangatna jotton ka·ahachim. Postal ballot-rangko changgittamna kingking chanaha indiba uamang angni cheaniko champengna man·jaha,” ine Kazi aganaha.
Dadenggre Assembly constituency-oba National People’s Party (NPP)-ni James Pangsang K Sangma aro TMC-ni Rupa M Marak-ni gisepo bilakbee susaaniko nikna man·aha indiba bon·kamao TMC-ni Rupa Marak, NPP-ni candidate James Sangma-ko 18 vote-rangchi cheangaha.
