Regional party dolsanko bikote dam 32 seat-rangko chechina Tynsong agana

SHILLONG: Khasi aro Jaintia Hills jolrango donggipa dingtang dingtang NGO-rang aro mitam political dolrang, Khasi-Jaintia chief minister-ko dabitokengon, regional party ba joltangni political dolsanko bikotchina aro election-o susae dam 32 seat-rangko chechina gita National People’s Party (NPP)-ni national vice president Prestone Tynsong ku·pattianiko on·ataha.
Tynsong-ni parakatani gitade, Khasi-Jaintia Hills jolrango gimik dam 36 Assembly constituency-rang dongani gimin, dingtang dingtang regional party-rang, dolsanchi political dolko bikotenba, election-o susae dam 32 seat-rangko chegenchimode altuaen sorkariko rikna man·aigen aro an·tangtangni namnikani gita jattangni chief minister-koba songna man·aigenchim.
“Da·o dipet Meghalaya a·doko baditaba dol regional party-rang donga aro ia dolrango mitamode sakbri aro mitamode sakbonga MLA-rangsan dongaia. Indide maikai iandakgipa dolrangoniko chief minister songna man·gen? Jattangni chief minister-ko nangnikenga ong·ode dolsanchi regional party-ko bikote, election-o dam 32 seat-rangko chechengbo aro unode sorkarikoba rikna man·gen aro chief minister-koba jattangonikon songna man·gen,” ine Tynsong parakataha.
HSPDP MLA sakgnini NPP baksa bakrimna manchianiko mande ra·china gitaba ua didiataha.
HSPDP-ni MLA sakgni, chong·motan Methodius Dkhar aro Shakliar Warjri sakgnian, NPP-ni dilanichi sorkariko rikanio bakrimna gita NPP-ni national president Conrad K Sangma-na Sukrobar salon an·tangtangni chittirangko on·manahachim aro ia sorkario BJP-ni MLA sakgni aro Independent MLA sakgniba bakrimengachim. Indake ong·genchimoba, ia MLA-rangni NPP baksa bakrimaniko dingtang dingtang NGO-rang jegalatenba, MLA saksani office nokko Sukrobar walo so·e galskaahachim.
Ia MLA-rangni NPP baksa bakrimaniko jegalna aro Khasi chief minister-ko dabina gitaba ia dolrang, Sonibar salo dingtangmancha jinma tom·bimonganiko Motphran-o ong·atangahachim aro ia tom·anio jegalenggipa dolrang, HSPDP MLA sakgnini bimangrangko tarie so·eba galahachim.
Indake ong·engon, iandake manderangni seoke watatgipa MLA-rangni kosako kragija kamrangko ka·ahani giminba NPP-ni national vice president Prestone Tynsong, an·tangni suk ong·gijaniko parakataha aro iandakgipa so·sojengjeng ong·atani kamrangko ka·jachina manderangko didiataha.
HSPDP MLA-rangni NPP baksa bakrimna manchianiko mande ra·china didiatengon, sorkario bakrimgipa ba opposition dolo ong·enggipa je dolba ong·china a·dok gimikni namgninasa kamko ka·na nanga ine Tynsong parakataha.