NEW DELHI: Ia bilsini Meghalaya Assembly election-ko ong·atanio, election-ni kamko ka·na re·angenggipa polling official saksa gari a·sel ong·e siangna nangahani gimin, election-ni kamrangko ka·enggipa official-rangna mitam kamrangko aro re·a doani kolrangko dingtangatchina gita Budbar salo, Tura-ni MP Agatha K Sangma, Election Commission of India (ECI)-ko didiataha.
Re·anggipa February-ni 27 tariko ong·atanggipa Meghalaya Assembly election-na skang, Tikrikilla constituency-ni Jangrapara polling station-o second polling officer-ni kamko ka·na re·angenggipa Chesan Marak, gari a·sel ong·e siangna gita nangahachim. Indake ong·engon, ia polling party-na on·gipa garini obostara namsrangjahachim aro ia gario polling official-rang walni somoion polling station-ona re·chakatangna nangaha ine Tura-ni MP, suk ong·gijaniko parakataha.
Mikkangchi iandakgipa a·selrang ong·taijana gita officer-rangna toni damrangko on·skae, uamang an·tangtangni jakkalenggipa garirangkon election-ni kamrangna jakkalna on·na nanga ineba Tura-ni MP, Election Commission-ko didiatenba, officer-rang an·tangtangni garirangko jakkalna man·jagenchimoba, namkala obostarango ong·enggipa garirangko on·skana nanga ine mol·molataha.
Gari a·sel ong·anio sianggipa Chesam Ch Marak, Tikrikilla constituency-ni Jangrapara polling station-o second polling officer-ni kamko ka·na gita donatako man·e February-ni 25 tarikon, an·tangni election dol baksa polling station-ona re·chakatangahachim indiba rasong gribee uamangko salangenggipa pik-up gari, Potamati songo a·sel ong·aha aro ua bilongbee saknaanirangko man·ahani a·sel siangna gita nangahachim.
Indake ong·engon, Election department-ni gita sianggipa mandeni nokdangna gong lak 15 compensation-ko parakatahachim.
