SHILLONG: Meghalaya Legislative Assembly-ni Speaker-na election-ko ong·atanio opposition dolrangoni susagipa dongjahani gimin Bristibar salo, North Tura-ni NPP MLA Thomas A Sangma, Assembly-ni 11-gipa Speaker-na seokako man·aha.
Seokako man·ani ja·man ua joljol ku·mikchete, biaptangko ra·angaha aro uni ku·mikchetanio gital MLA-rang aro dingtang dingtang dilgiparangba dongpae bak ra·angtokaha.
Thomas A Sangma-ni Speaker ong·e ku·mikchetangani ja·man pilak MLA-rangan, una namgipa skanirangko on·e ua an·tangni kamko kakket aro nama bewalo chu·sokatgen ine an·tangtangni ka·dongchakenganiko parakangtokaha.
Assembly-ni gital Speaker-na seokako man·gipa Thomas Sangma, gitcham MDA sorkariode, Chief Minister-ni adviser ong·e kamko ka·skaahachim ine nikna man·a.
Speaker-ni kamko ka·na gita ku·mikchetangani ja·man kobor ra·timgipa manderang baksa agangrikengon, pilak kamrangon ua pilak MLA-rangna apsan cholrangko on·gen ine Sangma, ku·rachakaniko on·angaha.
Lok Sabha-ni gitcham Speaker Purno A Sangma sagi baksa ru·utbea bilsirangna nangrimahanian uni Assembly-ko dilanio dakchakani ong·gen ineba gital Assembly Speaker parakataha.
“PA Sangma-ni siangna skang anga uni janggi tanganio bilsi 35 batpile unbaksa nangrimaha aro ian angni kamrango dakchakanirangko on·gen,” ine Thomas Sangma aganaha.
Skanggipa changna ua Speaker-ni biapo asongpana cholko man·aha ine janapatengon, “Anga ka·donga, bak ra·enggipa pilak MLA-rangnan anga jakgitelaniko aro apsan cholrangko on·e an·chingni nitobegipa a·dokna dingtanganiko ra·bana man·gen,” ine Sangma aganaha.
Gital seokako man·gipa MLA-rangna orientation program-ko ong·atna gita ua Delhi Parliamentary Research Society baksa agangrikenga ineba Assembly-ni gital Speaker parakataha.
