TURA: Mongolbar attamo, Tura jillani samba jolo donggipa Rongram bazar-o dokkan dake cha·enggipa manderangoniko niam gri tangka gildrae ra·anina aro dosgri mande sakgniko attechi den·a jotton ka·ani gimin jolni manderang jinma chadrapaha aro ja·mano uko police-rang rim·aha.
Koborko on·ani gitade, ia a·sel ong·ani Mongolbar attam 7:00 bajimango ong·aha aro ua somoio Dr Jimmy Carter N Sangma, an·tangni mande sakgittam baksa Rongram bazar-o dokkan dakenggipa manderangoniko tangka gildrae ra·engachim.
Ia manderangni iandake tangka gildrae ra·engmiting somoio jolni manderang re·bae, uamangko champengna jotton ka·on, ia doctor an·tangni atteko ra·e Akgrimran Marak aro Silman Sangma minggipa mande sakgniko den·a jotton ka·aha indiba rasong gnange uamang sakgnian bang·gija mata bu·anikosan man·aiaha.
Ia doctor-ni iandake manderangko attechi den·a jotton ka·on, jolni manderang ka·a ding·chaoe uamangko chadrapaha indiba uni mande sakgittamde ua biaponi kate jokna man·aha.
Ia doctor-ko manderang jinma chadrapani ja·man uni Mahindra pik up garikoba sambao donggipa Ganol chiringona galonataha.
Ia doctor-ko manderangni jinma chadrapengmiting somoio bakan Rongram-ni police-rang sokbae, uko rim·angaha indiba manderang Rongram thana-onaba re·ange, uko manderangni jako pakwatchina dabitokaha.
Indake ong·genchimoba ja·mano ua biapona gipin police dolrang sokbadapaha aro ja·mano ia doctor-ko rim·e sanna gita rimangaha.
Ja·mano ia doctor-ni kosako attechi den·ako man·gipa mande sakgni, police-rangna FIR ka·doangaha.
Kobor on·timgiparangni u·iatani gitade, dos dakgipa Dr Jimmy Carter N Sangma, skang somoirangoba GNLA bobil dolni bimingo iandake tangka paisarangko gile ra·rongachim aro changsade uko me·chik bi·sa saksako drae til·ekani giminba police-rang rim·ahachim.
