SHILLONG: Meghalaya a·doko Power department-ni kamrangko namdapatna nangenga ine Bristibar salo, a·dokni Power Minister Abu Taher Mondal parakataha.
Bristibar salo, MeECL aro Power department-ni officer-rang baksa tom·ani ja·man, kobor ra·timgipa manderang baksa agangrikengon, “A·doko power department-ni kamrangko chinga pilakni gitan namdapatna kam ka·gen,” ine Mondal, ku·rachakaniko on·angaha.
MeECL-chi a·dokna man·dapaniko ra·bana aro a·dokni manderangna nambate dangdike on·na gita ua cholrangko sandigen ineba Mondal parakataha.
MeECL-ko chalaianio kamrangko namdapatna gita dingtang dingtang committee-rangni ku·pattie on·anirangko uamang name nigen ineba Power Minister parakataha.
“Nanggenchim ong·ode MeECL-ko nambate chalaina chinga gipin dolrangna ba sorkari dolrangna pakwate on·skagen,” ine ua aganaha.
Power Minister-ni parakatani gitade, MeECL-ko Distribution, Transmission aro Generation bakgittam dake sualaniara gipinrango pangchakna nangjana gita aro an·tangtangon ka·dongna man·na gitasa sualahachim.
“MeECL-ko nambate chalaichina chief minister-ba didinaba gnang. Ta·rakede man·janaba gnang indiba MeECL-chi man·dapanirangko ra·bana gita bang·en dakna nanggnirang dongenga,” ine Mondal aganaha.
Skangode Meghalaya a·doko nangana bate bijoliko man·achim ine gisik ra·atpilaniko on·angengon, uade skangni somoiosachim indiba da·ode a·doko bijoliko bang·en nangengaha ine Power Minister parakataha.
Dingtang dingtang power company-rangna gro nangenggipani gimin janapatskaengon, iani bidingo ua sorkari baksa agangrikmanaha ine Mondal parakataha.
MeECL-o kam ka·enggiparangni neng·nikanirangko maikai namatgen ine sing·anina aganchakaniko on·angskaengon, dormaharangkode bijoli on·anichin MeECL on·na man·na nangachim ine Mondal parakataha.
“Da·o dipet chinga noksano chalaiengani gimin ia noksan ong·aniko komiatna cholrangko sandina nangenga. Ian officer-rangko nambate nirokna gita MeECL-na dakchakani ong·gen. Uamangoni bang·batan pension-rangkoba man·jaenga,” ine Mondal aganaha.
NTPC baksa songgigrikani a·selba MeECL neng·nikanirangko chagrongna nangenga ine janapatskaengon, NTPC baksa neng·nikanirangko namatna man·genchimode MeECL nambata obostao ong·genchim ine Power Minister parakataha.
