SHILLONG: Sorkari ong·gijagipa LP skulni skigiparangko kamo regularise ka·ani cholrangko sorkari nichenggen ine Mongolbar salo, a·dokni Chief Minister Conrad K Sangma parakataha.
“Nangani kri ja·kurangko de·na man·na gita chinga iani bidingo cholrangko name nichenggen,” ine Chief Minister, Assembly-o aganaha.
Chief Minister-ni parakatani gitade, batanggimin bilsirango Meghalaya Democratic Alliance (MDA) sorkari, sak 461-na baten skigiparangko sorkari ong·gijagipa LP skulrango regularise ka·e on·anichi bilsi 30-mangna matchotgija dongenggipa kamrangko chu·sokatna man·ahachim.
Iana skang, Assembly-ni Budget Session-o Nongpoh-ni UDP MLA Mayralborn Syiem-ni sing·anirangna aganchakaniko on·angengon, sorkari LP skulrango sak 1985 skigiparango regularise ka·aha ine a·dokni Education Minister Rakkam A Sangma parakataha.
Sorkari ong·gijagipa LP skulrango skigiparangni gimin sing·skaon, da·o dipet ua iani bidingo maming kobor dongkujaenga indiba iani bidingo ua am·sandianggen ine Sangma parakataha.
