TURA: Jatni doka dam·ani bidingo skie on·na gita re·anggipa March 27 tarikoni March-ni 31 tarikona, A·chik Literature Society (ALS), NEHU Tura Campus-ni Garo Department baksa nangrime, Traditional Musical Instruments & Performing Arts-ni gimin Regional Workshop-ko NEHU Tura Campus-o ong·atangaha.
Ia workshop-ni valedictory program-ko March-ni 31 tariko ong·atangaha aro ia program-ko ong·atanio ABDK-ni gitcham padot Aloysius G Momin, mongsonggipa sokgipa ong·e jinmana aganprakangengon, jatni doka dam·ani aro chrokanirangko A·chik chadamberang skie ra·anichi, sakgipinrangna skie on·skae an·tangtangnaba janggi tangani cholrangko dake ra·na man·gen ine ku·pattianiko on·angaha.
Chasongni kri jatni doka-dam·anirangko nambatatna aro nitobate tarina cholrangko sandina aro jotton ka·na nangenga ineba Momin aganaha.
Ia tom·anio a·dok sorkarini gitcham IAS officer Lutherine R Sangma-ba dongpae jinmana aganprakangengon, Wangala chrokanio doka dam·ani aro chrokanio changgipa sapgipa manderango name skie ra·china gita ia workshop-o skie ra·gipa chadamberangko didiangaha.
Ia program-o NEHU Tura Campus-ni ning·o donggipa Garo Department-ni Head, Dr Jacqueline R Marak-ba jinmana aganprakengon, ia workshop-o bak ra·gipa me·chikrangni bangsi tarina aro bangsi sikna gisik nanganiko nike, an·tangni kusi ong·aniko parakangaha.
Ia salbongana ong·atanggipa workshop-o Wangala chrokani, dama, sarinda, chigring tariani aro dokani, bangsi tariani aro sikani aro Wangala grikanirangkoba skie on·angaha aro ia workshop-o Selbalgre-ni Ringjeng T Sangma, uni jikgipa Sotjak Ch Marak, Rombagre-ni Dewal M Sangma, uni chawari Lindinbirth S Sangma, Gondenggre-ni Dirot Ch Sangma, Jalet D Sangma aro Raksamgre jolo donggipa Upper Watregre-ni Tengchon R Marak skie on·angskaaha.
Ia workshop-ko ong·atanio sak 27 me·asarang aro sak 43 me·chikrangko man·chape gimin sak 70 chadamberang bakko ra·angaha aro ia workshop-o bak ra·gipa chadamberangara, NEHU Tura campus, ICFAI University, Tura Govt College, Capt William School aro Rongkhon Don Bosco School-ni chatro chatrirang ong·a.
Workshop-o skie ra·gipa chadamberangna valedictory program-ko Aloysius G Momin-ni jakchi certificate-rangko suale on·angaha.
