SHILLONG: Re·baenggipa 2024 bilsio ong·atna sienggipa Lok Sabha election-ni bidingo Meghalaya a·dokni Trinamool Congress (TMC), ia April jani gittamgipa antio chanchianggen.
Iani bidingo kobor ra·timgiparangna u·iatengon, da·o dipet TMC-ni dilgiparang, Lok Sabha election-ni gimin chanchia dongkuja ine Robibar salo, All India Trinamool Congress (AITC)-ni state president Charles Pyngrope parakataha.
Re·baenggipa bilsini Lok Sabha election-o AITC susagenma susajawa, ukoba ua da·o dipet aganna man·kujawa ineba Pyngrope parakataha.
Iani bidingo uamang, April jani gnigipa ba gittamgipa antio tom·e chanchianggen ineba ua parakataha.
2019 bilsini Lok Sabha election-o Shillong Lok Sabha seat-ko Congress-ni Vincent Pala aro Tura seat-ko NPP-ni Agatha K Sangma cheahachim ine nikna man·a.
Tura Lok Sabha seat-ara bilsi 10-mang ong·na sipile a·dokni Chief Minister Conrad Sangma-ni nokdangnan a·dam gita ong·pilengachim aro 2019 bilsini Lok Sabha election-oba NPP-ni Agatha K Sangma, a·dokni gitcham chief minister aro Congress-ni dilgipa Mukul Sangma-ko chee, Tura-ni Lok Sabha MP ong·piltaina man·ahachim.
2019 bilsio Congress dolni Vincent Pala, UDP-ni Jemino Mathoh, BJP-ni Sanbor Shullai, KHNAM-ni THS Booney aro sakgni Independent candidate-rangko chee, Shillong Lok Sabha-ni MP ong·piltaiskana man·ahachim.