SHILLONG: Ia bilsini Meghalaya Assembly election-ode nambate dakna ka·dongsoahaoba, 2018 bilsio gitan seat damgnikosan cheriktaina man·aiahani gimin mikkangchi election-rango nambate dakangna aro chu·sokgijanirangko nipilna gita Sombar salo, BJP-ni tom·aniko ong·atangaha aro ia tom·anio BJP-ni national general secretary Rituraj Sinha, BJP-ni Meghalaya in-charge M Chuba Ao aro gipin dilgiparangba bakko ra·angtokaha.
Tom·a matchotani ja·mano kobor ra·timgipa manderang baksa agangrikengon, election changantio jekai uamang rake kamko ka·engachim, apsan daken da·o Lok Sabha election-naba uamang rake kamko ka·angkugen aro manderangna cholko on·gen ine Sinha parakataha.
Assembly election-o BJP-ni chu·sokjahani gimin sing·on, campaign ka·ani ja·man result-rang ong·katon uamang manderangni seokaniko ka·dongsoa aro iakon uamang ja·rikaha ine Sinha parakataha.
Meghalaya a·dokni manderang BJP-ko geltokkuengama ine sing·anina aganchakaniko on·angskaengon, Meghalaya a·doko BJP-na manderangni chakpaanirangko da·o batengaha ine Sinha parakataha.
“Bang·bea manderang BJP-o napaha aro chinga dam 60 seat-rangon candidate-rangko susaatna man·aha. BJP-ni tom·anirangko ong·atanioba bang·bea manderang bakko ra·aha, uni gimin Meghalaya a·doko BJP-na chakgiparang bang·bataha. BJP-ko bilakbatatna gitade chinga kamrangko name nipiltaina nangkuenga aro pangnan indaken ong·aia,” ine BJP-ni national general secretary aganaha.
A·doko tangka paisarangko jakkalsretani gimin BJP-ni matnangenggipani bidingo sing·skaon, da·o election-rang matchotangaha aro Meghalaya a·doko kim·kimgipa sorkariko ong·atna kamko ka·anisa ong·engaha,” ine Sinha aganaha.
Meghalaya a·doko bang·en namroro silroroanirangko nangkuenga aro tangka paisani gitaba neng·nikanirangko man·enga ine janapatengon, ia neng·nikanirangko namatna gitade ma·mong aro a·dok sorkarirang bakrime kamko ka·na nanggen ine Sinha parakataha.
