SHILLONG: Re·anggipa February jao ong·atanggipa Meghalaya Assembly election-o BJP-ni candidate-rangko noktangtangonin ong·katna on·jani a·selsa Garo Hills-o seat damsakoba chena man·jaha ine Mongolbar salo, BJP-ni state vice president Bernard N Marak matnangataha.
Iani bidingo kobor ra·timgipa manderang baksa agangrikengon, ia election-o BJP-ni candidate-rang, gipin dolni candidate-rang baksasan susana nangaigenchim ong·ode bang·a seat-rangkon chegenchim indiba BJP-ni candidate-rang, pilak baksaan susana nangao ga·akaha ine Marak, Shillong-o kobor ra·timgiparangna parakataha.
“Election-ni bon·kamgipa salgnini gisepo BJP-ni bang·bata candidate-rangkon nokoni ong·katna on·jaha aro candidate-rangni cholgugarango manderang nitime dongtokaiaha. Ua somoio chinga ong·katangode chingko tangka suala ba uandakgipa dingtang dingtang matnanganirangko dakskaaigenchim,” ine Marak aganaha.
BJP-ni gitaba hisapanirango gualanirang dongaha ine ku·rachakangengon, re·baenggipa bilsini Lok Sabha election-ode ma·mong sorkarini on·atgipa scheme-rango pangchake BJP, a·dokni seat damgnikon chena krenggen ine BJP-ni state vice president parakataha.
Ma·mong sorkarini bang·bata scheme-rangan manderangona sokangjaenga ine an·tangni suk ong·gijaniko parakatengon, a·doko Jal Jeevan Mission (JJM)-ni kamrangkode ka·enga indiba manderang chirangkon man·jaenga aro PMAY scheme-ba donga indiba manderang nokrangkon man·jaenga ine Marak matnangataha.
A·doko tangka paisa jakkalsretaniko BJP warachakangkugen ine janapatengon, BJP-na manderangni pu·onani batrorobaengaha aro tangka paisa cha·aniko namnikgijagipa manderangsa BJP-na pu·onenga ine Marak parakataha.
