TURA: Meghalaya a·doko skigiparang chu·ongjaengani gimin sak 1200 skigiparangko temporary basis-o ra·chenggen ine adita salrangna skang ong·atanggipa Assembly budget session-o Education Minister-ni parakataniko Human Rights & Anti Corruption Youth Power of India (HRACYPI) jegalatenba, temporary basis-o skigiparangko ra·ani pal Meghalaya Teachers Eligibility Test (MTET) pass ka·e dongenggipa candidate-rangkon kamo ra·china a·dok sorkariko didiataha.
HRACYPI-ni district youth secretary Flaming B Marak-ni parakatani gitade, Meghalaya a·doko skigipani kamna MTET-ko pass ka·na nangtela ine National Council for Teachers Education (NCTE)-o dongimin niamrang dongachim aro uandaken da·o skigiparangko temporary basis-o rakkina gita sorkarini miksongenganiara NCTE-ni dongimin niamko aro High Court-ni rai on·aniko pe·ani gita ong·engachim.
2019 bilsionin Meghalaya a·doko MTET-ko ra·ahani gimin bang·a candidate-rangan da·o MTET-ko pass ka·e dongengoba kamrangko man·tokkujaenga ine janapatengon, skigiparangko temporary basis-o ra·gija MTET pass ka·gimin candidate-rangkon kamo ra·china HRACYPI, a·dok sorkariko didiataha.
