TURA: Meghalaya High Court-ni on·gimin niamrangko pe·e aro nangchakegipa department-rangoniko permission ra·chengani gri North Garo Hills a·jani Wageasi jolo donggipa Manda chiringoniko niam gri an·cheng kitengani gimin Forest department-ni gita sandirokaniko dakna ku·rachakaniko on·ataha.
Koborko on·ani gitade, ia chiringoniko niam gri an·cheng kitengani a·selan ia chiringo pokkri kita gita dakpilengahachim indiba ia biapo niam gri an·cheng kitaniko champenggiparang dongkujaengani a·selan an·chengrangko kitani batroroangengahachim.
Kobor on·timgiparangni u·iatani gitade, ia biapo dal·dalgipa ostro bolgniko jakkale, an·chengrangko salantian kitenga aro ia an·chengrangko ja·mano palna ba nokrangko rikanio jakkalna gita ra·angskaengachim.
Ia biaprangoniko iandake dal·dalgipa ostrorangchi an·chengrangko kitengani a·selan ka·ma jolrango songdongenggipa manderangonade chirang komibatesa jokangengaha aro uandaken manderang neng·nikanirangko chagrongna nangtokengaha ineba kobor on·timgiparang parakataha.
Iani bidingo, North Garo Hills a·jani DFO Sathish KS-o sing·sandiaton, ia biaponiko an·cheng kitna gita darangba permission ra·a dongkuja aro iani bidingo department-ni gita sandirokaniko dakanggen ine ua parakataha.
“Da·o Easter-ni somoi ong·ani gimin ia Range-o kam ka·giparang komienga indiba ia biapo niam gri an·chengko kitenggipani bidingo uamangna u·iatmanaha aro uamang Sombar salon ia biapko re·ange niegen. Iani bidingo sing·sandina gita ua jolni Nokmakoba range office-ona okamatenga,” ine North Garo Hills a·jani DFO Sathish parakataha.
NGH-ni Manda chiringo niam gri an·cheng kitaniko Forest dept sandirokgen
Date:
Share post:
