SHILLONG: Dingtang dingtang a·selrangchi ja·manchakatako man·ahaoba North Eastern Indira Gandhi Regional Institute of Health & Medical Sciences (NEIGRIHMS)-ni Research Cancer Centre-ko da·o matchotangengahani gimin mikkang jaode ia centre-ko kulinaba dongaha.
Meghalaya a·doko cancer sagiparangko sanna gita cholrang dongjani gimin aro chol ong·kalgipa manderangsan gipin biaprangonaba re·ange cancer saaniko sanna man·engani gimin ia NEIGRIHMS-ni Research Cancer Centre-ko kulianiara a·dokni manderangna bang·a dakchakani ong·na siengachim.
NEIGRIHMS-ni Director, Prof (Dr) Nalin Mehta-ni parakatani gitade, ia Research Cancer Centre-o gimik ge 252 palangrang donggen aro ia centre-o dingtang dingtang rokomni cancer man·gipa manderangko sanne bane on·anggen.
Ia centre-ko rikani da·o 95 percent-de matchotmanaha ine talatangengon, ia centre-ko rikenggipa company, kamrangko matchotahaon re·baenggipa jaode NEIGRIHMS-na pakwate on·gnok ine Prof Mehta parakataha.
Batanggimin bilsirango sajinmarangni a·selba ia centre-ko rikanio ja·manchakatako man·ahachim indiba da·o ia cancer centre-ko matchotangengahani gimin a·doko cancer saenggipa manderangba sanna bananirangko ra·na man·pagnok.
Meghalaya a·doko manderang guerangko cha·batani gimin a·song gimiko Meghalaya a·dokan oral cancer ba ku·sikni pariko man·anio bang·batgipa ong·enga ine batanggimin somoirangoba Meghalaya High Court, mikrakatanirangko on·angahachim.
Adita salrangna skangsan, a·dokni Health Minister Ampareen Lyngdoh-ba cancer sabisian Meghalaya a·doko mandeko so·otbatenggipa sabisi ong·enga ine parakatenba, a·doko cancer sabisiko warachakna sorkari rakbee kamrangko ka·engaha ine parakatahachim.
