SHILLONG: Roster system-ni bidingo jera ra·grikanio, Meghalaya a·dokni Reservation Policy 1972-koba mitam dolrang nipiltaichina aro gital dake taripiltaichina dabitokengon, Reservation Policy-kode skango gitan donaichina Federation of Khasi Jaintia & Garo People (FKJGP) didiatskaaha.
FKJGP-ni president Cliff Dundee Khongsit-ni kobor ra·timgiparangna parakatani gitade, a·dokni Reservation Policy-ara namen chanchininge kamko ka·na nanggipasa ong·a aro ia Reservation policy-ko taripiltaina nanggenchimode Khasirang man·dapani pal batesa gimaatani cholrangba dongachim.
“Ian namen chanchiningna nanggipa kamsa ong·a aro man·a dipetde 1972 bilsio ra·gatgipa State Reservation Policy-ko apsan daken donon nambata. Ia Reservation Policy-ko taridapanichi an·ching man·dapani pal batesa gimaatna nangnaba gnang,” ine Khongsit aganaha.
Meghalaya a·doko mongsongbatgipa Khasi aro Garo jat dolgnian ia Reservation Policy-o 40 percent ka·e bak rengsiko man·engani gimin dolgnian namgniko man·paenga ineba ua aganaha.
“Angni ma·siani gitade, kamrangko ba cholrangko kanganio 50 percent-nade batna man·ja. Uni gimin kacharini gita bak on·pagenchimode da·o an·chingni man·enggipakoba an·ching gimaatsrangnaba gnang,” ine FKJGP-ni president parakataha.
Indake ong·genchimoba, roster system-ko tarianio batanggimin somoiko nipilgija mikkangchini giminsa niani gnang tarichina gita FKJGP dabiangskaaha.
Khongsit-ni parakatani gitade, 1972 bilsiona re·angpile roster system-ko ra·gatgenchim ong·ode gitcham record-rangko sandipilna gita sorkari department-rangba neng·nikanirangko man·na nanggnok.
Meghalaya High Court-ni ge·etanio uamang kusi ong·aia ine janapatengon, roster system-ko mai bilsioni ra·gatgen uade da·o sorkarini jakosa ong·aiaha ine Khongsit parakataha.
