SHILLONG: Roster system-ara namen simsakbena aro chanchibewalna nanggipa kamsa ong·ani gimin darangba skatang aganaigija nambata gadango jinma chanchirimna man·ode nambatgen ine Mongolbar salo United Democratic Party (UDP)-ni president Metbah Lyngdoh parakataha.
Uni chief minister Conrad K Sangma-ko gronge agangrikgipani bidingo janapatengon, “Chief Minister-ni a·dokona re·bapile skanggipa changna office-o asongeani somoion anga uko gronge, reservation policy aro roster system-ni bidingo adita chanchirimaha,” ine Lyngdoh parakataha.
Lyngdoh-ni parakatani gitade, roster system-ara namen simsakbena aro chanchibewalna nanggipa kam ong·ani gimin a·doko songdongenggipa pilak manderangni namgninan iani bidingo tom·tomao agangrikchina gita ua chief minister-ko didiaha.
“Ian namen simsakbena nanggipa kamsa ong·a aro darangba an·tangtangni skani gita agane rona man·jawa. Chinga a·dokni namgninasa kamko ka·enga, uni gimin ia roster system-ni bidingo agangrikengon, nambata bewalosa ong·na nanggen,” ine UDP-ni president aganaha.
Iani bidingo dingtang dingtang dolrang baksa name chanchibewalna nanga ine janapatengon, ia tom·anirango uamangba an·tangtangni nangnikani aro ku·pattianirangko on·anggen ine Lyngdoh parakataha.
Roster system-ni bidingo dingtang dingtang dolrangni dabienggipani giminde ua mamingkoba aganna jechakskaaha.
Roster system-ni bidingo chanchirimna gita UDP-ba Assembly-ni special session-ko ong·atchina nangnikengama ine sing·on, “Gipin political dolrangni dabienggipani giminde ango maming aganna nangani dongjawa indiba nanggenchim ong·ode chinga namgipa gadango agangrikna kusi ong·aigen,” ine UDP-ni president parakataha.
Roster sysem-ni bidingo agan-chanchirimanide chief minister-an nambatgipa chol ong·enga aro UDP-ba una an·tangtangni nangnikanirangko aganmanaha ineba ua aganaha.
