SHILLONG: Batanggimin bilsi bongani gisepo maming niksamsoani gnang kamko ka·ani dongjani a·sel aro kamrango chu·sokgipa ong·jani a·selsa da·o load shedding ba bijoli kimitani somoiko baridaproroe manderangna neng·nikanirangko ra·baenga ine Robibar salo All India Trinamool Congress (AITC), National People’s Party (NPP)-chi dilenggipa MDA sorkariko matnangataha.
Bijoliko bredapna gita adita salrangna skang a·dok sorkarini parakatgipani bidingo janapatengon, a·doko nangenggipa bijoliko sorkari on·na man·jaengani gimin salo konta 7-8 ka·e bijoliko kimitangkuna nangaigen aro baditaba somoirangna chu·onggijagipa bijoliko gapatnasa sorkari, bijoliko bredapna miksongenga ine Meghalaya AITC-ni vice president George B Lyngdoh parakataha.
“Batanggimin bilsirangode konta 3 ba konta 4-mangnasan bijoliko kimitrongaiachim indiba da·ode bijoli kimitani somoiko salo konta 7 ba konta 8-mangona ra·doatskaengaha aro manderang bang·en noksan ong·na gita nangtokengaha,” ine Lyngdoh aganaha.
Bijoli kimitani somoiko bakrodapataniara manderangna neng·nikanirangko ra·baanisan ong·aigija Tourism-o bading chiwalanirangko dakenggipa manderangnaba noksan ong·aniko ra·baani ong·enga ineba Lyngdoh parakataha.
Ru·uta somoirangna bijoliko kimitengani gimin an·tangni suk ong·gijaniko parakatengon, “Songadam nokadamrangode samrangko refrigerator ba ka·sinate donna jakkalgipa ostrorangosa donengani gimin iandake baditaba kontarangna bijoliko kimitaniara Health department-naba nangchakeaniko ra·bagen,” ine AITC-ni vice president parakataha.
Bijoli kimitaniko bon·atna man·na gita ta·raken kamko ka·china gitaba Lyngdoh, a·dok sorkariko didiataha.
“Uni gimin manderangni neng·nikanirangko aro noksan ong·anirangko chanchie a·dok sorkari, iako namatna gita ta·raken ja·kuko de·na nangengaha,” ine ua aganaha.
