SHILLONG: Meghalaya a·doko Trinamool Congress (TMC)-ni sakbonga MLA-rang, Bharatiya Janata Party (BJP)-o napna miksonganirang donga ine jangbingbangenggipani bidingo da·o dipet BJP-ni dilgiparangde maming kobor man·soa dongkuja ine Sombar salo, Meghalaya BJP-ni state president Ernest Mawrie parakataha.
“Da·o dipet TMC-ni MLA-rang BJP-o napna miksongenga ine jangbingbangenggipani bidingo chingade mamingkoba ma·sia dongkuja. Haida TMC-ni MLA-rang, BJP-ni dilgipa Alexander Laloo Hek baksa agangrikenggen maina uasa TMC-ni MLA-rang baksa tom·e agangrikaha ine jinmana parakataha. Indiba gipin dilgiparangde iani bidingo mamingkoba knasoa dongkuja,” ine Mawrie parakataha.
Da·o dipet TMC-ni MLA-rang, BJP-o napna gita a·dokni BJP dilgiparang baksade agangrika dongkuja ineba ua talataniko on·angaha.
BJP-o napna sikenggipa manderangkode je dolniba ong·ja maina, uamang rimchaksona kusi ong·aigen ineba Mawrie parakataha.
“Saoba BJP-o napna sikenga ong·ode chinga uamangko rimchaksona kusi ong·aia indiba uamang, ma·mong aro a·dokni dilgiparangnaba u·iatchengna nanggen,” ine BJP-ni state president aganaha.
TMC-ni MLA-rang BJP-o napna miksongengani gimin adita salrangna skangsan ua, TMC-ni dilgiparang baksa agangrikaha ine BJP-ni MLA aro Cabinet Minister AL Hek parakatahachim ine nikna man·a.
Indake ong·genchimoba, uamang cha ringjoljolesa iani bidingo agangrikaiaha ineba ua aganahachim.
Hek-ni aganani gitade, ua TMC-ni state president Charles Pyngrope aro parliamentary party-ni dilgipa Mukul Sangma baksa agangrikahachim.
“AITC-o MLA sakbonga dongani gimin saksa sakgni BJP baksa bakrimaigenchim ong·ode anti-defection law-ko pe·ani gita ong·gen ine uamang apsan chanchirimna tik ka·aha. Iani bidingo anga AITC-ni president Charles Pyngrope aro Parliamentary Party-ni dilgipa Mukul Sangma baksa agangrikaha aro uamangba iakon dakna nangnikenga,” ine Hek aganaha.
AITC MLA-rangni aganchakani mai ong·gen, ukode ja·manosa ma·siaignok ineba Hek parakataha.
“Chinga da·o uamangni aganchakaniko sengengkua aro uni ja·mande chinga nanga gita ja·kurangko de·anggnok,” ine ua aganaha.
