SHILLONG: Re·baenggipa May 10 tariko ong·atenggipa Sohiong Assembly constituency-ni election-o gipin political dolni candidate-rangko seokede maming namgnirangko man·jawa aro National People’s Party (NPP)-sa sorkariko dilengani gimin, NPP-ni candidate-ko seokgenchimosa constituency-ni manderang dingtanganiko nikna man·gen ine Sombar salo, a·dokni Chief Minister aro NPP-ni national president Conrad K Sangma, Sohiong constituency-o NPP-ni candidate Samlin Malngiang-na campaign ka·angengmiting somoio parakataha.
Meghalaya a·doko niamo pangchake koela bikotaniko a·bachengatpiltaina uni sorkari rakbee kamrangko ka·enga ine janapatengon, koela bikotgipa mande sakbrini mining lease-rangko ma·mong sorkari ra·chakmanaha aro niamo pangchake koelarangko bikotna gita lekkani kamrangko da·o sal 60-ni gisepon matchotgnok ine Chief Minister parakataha.
Gong kror 800-na batgipa Western bypass project-ni gimin aganangengon, ia project-ko jolo songdongenggipa manderangni janggi tanganiko dingtangatna gita NPP a·bachengataha ine Sangma parakataha.
“Ia Western Bypass-ni 80 percent-mangni gitade ia constituency-onin re·anggen aro ia Bypass-ko matchotahaode, ia constituency-ni manderangna kam ka·e cha·ani cholrangko on·na man·gnok, tourism-ba tang·dognok aro game ge·e cha·giparangba bang·en namgnirangko man·gnok. Ian NPP-ni namroro silroroanina ka·enggipa kamrang ong·a,” ine NPP-ni national president aganaha.
Lekka pora aro an·seng baljokani kamrangko namdapatchina manderangni dabianirangko sorkari jako ra·e ka·anggen ineba ua ku·rachakaniko on·angaha.
Politics-ni kamrangko ka·anio ku·mong nangrimani dongna nangani gimin janapatskaengon, mitam political dolrang aro dilgiparang, apsan kamrangko ka·rimani ja·manoba election-ni somoirangode NPP-ni kosako matnanganirangko dakronga ine Chief Minister parakataha.
“Uamangna (Political dolrangna) anga iako aganna ska, India a·songni dakbewal rikbewalo, Khasirangni dakbewal rikbewalo aro Garorangni dakbewal rikbewaloba chingade maming saloba cha·atango studapgiparang ong·ja. Iako pangnan gisik ra·china,” ine Sangma aganaha.
“Chingade namgiparang aro ka·sachakgiparang ong·a aro ku·cholsa ong·e kam ka·anio chinga bebera·ani giminsa kamrangko ka·rima. Ia manderangni kosako anga katta mingsakoba agankujachim indiba uamangni iandake matnanganirangko aro chingni kosako politics kal·na jotton ka·ako knae anga namen ka·a be·a. Ian an·chingni manderangna aro an·chingni a·dokna nitogijani ong·chongmota,” ine Chief Minister aganaha.
Sohiong constituency-o namroro silroroaniko ra·bana gita NPP-ni candidate-ko seokchina manderangko didiangengon, NPP-sa sorkariko dilenggipa ong·ani gimin Sohiong constituency-o namroro silroroaniko ra·bana gitade NPP-ni candidate-ko seokanichisa man·gen ine NPP-ni national president parakataha.
