SHILLONG: People’s Democratic Front (PDF)-ni MLA sakgniko man·chape pilak dilgiparangan, National People’s Party (NPP) baksa bakrimna tik ka·angani ja·man Budbar salo, PDF-ni vice president James Ban Basaiawmoit, kamtangko wate PDF-oni ong·akatskaaha.
Ua an·tangni kam watani chittiko PDF-ni president Gavin Miguel Mylliem-na on·eaha.
Iani bidingo kobor ra·timgipa manderang baksa agangrikengon, ua NPP baksa bakrimanio bak ong·pana nangnikjaengani gimin PDF-oni ong·katna nangnikskaaha ine Basaiawmoit parakataha.
“PDF CEC-ni pilak membor-rangan NPP-o bakrimaniko namniktokaha ine anga knaengani gimin da·o anga saksansa ong·aiaha,” ine PDF-ni vice president aganaha.
Ua an·tangba PDF-ko bikotdilchenggiparangoni membor saksa ong·achim aro iandake NPP baksa bakrimaniara namen dukni katta ong·aha ineba Basaiawmoit parakataha.
“Ian namgijagipa chin gita ong·a maina manderang, joltangni dolrango ka·dongna man·jawaha,” ine ua aganaha.
PDF-ni dilgiparang, re·baenggipa May-ni 6 tarik Sonibar salo NPP baksa bakrimgnok ine Mongolbar attamosan a·dokni Chief Minister aro NPP-ni national president Conrad Sangma parakatahachim ine nikna man·a.
