SHILLONG: 1972 ra·gatgipa State Reservation Policy-ko nipiltaichina dabie, Mongolbar salo, Synjuk Waheh Shnong Ri Jaintia, Synjuk Waheh Shnong Jowai, Jaintia Students Union (JSU), Jaintia Youth Federation (JYF), Jaintia Students Movement (JSM) aro East Jaintia National Council (EJNC) dolrangni nangrime bikotgipa Jaintia Co-ordination Committee for Reservation Policy (JCCRP)-ni membor-rang, a·dokni Deputy Chief Minister Sniawbhalang Dhar-na memorandum-ko on·eaha.
Reservation Policy-ko ra·gatchengaoni Roster System-ko a·bachengatjachina gitaba JCCRP, a·dok sorkario dabiangaha.
Meghalaya a·doko da·o mandeni jelbra jelsuani batahani gimin aro lekka pora donggipa chadamberangba bang·batahani gimin 1972 bilsio ra·gatgipa Reservation Policy-ara da·o mitam jatrangkode nichanggalani gita ong·enga ine Reservation Policy-ko gital dake taritaipilchinaba sorkario dabiangaha.
Reservation Policy-ko nipiltaichina aro roster system-ko ra·gatkujaskal, a·dokni pilak department-rangon kam on·aniko dontongkuchina dabie Voice of the People’s Party (VPP)-ni membor-rangba, re·baenggipa May 12 tariko, a·dokni Chief Minister Conrad K Sangma-na memorandum-ko on·na gita jinma Secretariat-ona re·jomangna manchisoengachim ine nikna man·a.
VPP membor-rangni Secretariat-ona re·jomanio manderangkoba bak ra·china gita VPP-ni dilgiparang didiatahachim.
VPP-ni dilgipa Batshkem Myrboh-ni kobor ra·timgiparangna parakatani gitade, roster system aro reservation policy-ni bidingo chanchirimna gita Assembly-ni Special Session-ko ong·atchina dabianiko sorkari knachakjahani gimin uamang, a·dokni Chief Minister-ko gronge memorandum-ko on·skana sienga.
Roster system-ko name tik ka·chenggija kamrangko on·enganiara Khasi aro Jaintia candidate-rangni kosako re·ani gita ong·enga ineba Myrboh parakataha.
