U·IATTIMGIPAONI
SHILLONG: Bharatiya Janata Party (BJP) baksa bakrimna gita New Delhi-ona re·ange BJP-ni dilgiparangko grongeaha ine jangbingbanganiko Meghalaya Trinamool Congress (TMC)-ni dilgipa Mukul Sangma jegalatenba, ian manderangni chanchichipanisan ong·aia ine parakataha.
“Ian manderangni chanchichipe agananisan ong·aia indiba anga na·simangni chanchichipaniko champengna man·skaja. Indiba iandakgipa golporangko songbadrango sena skang, kakketkoba sandichengbo. Da·o election ong·engani gimin golporang election-o nangegiparangsa ong·na nanga,” ine Sangma, kobor ra·timgiparangna aganaha.
A·doko dingtang dingtang neng·nikanirangko chagrongna nangengani gimin iandakgipa kamrangosa gisik on·batna nangenga indiba iandake chanchichipaniara kamrangko gelna jotton ka·ani gitasa ong·enga ineba ua aganaha.
“Chinga na·simangni sambaon donga, chingo sing·bo aro kakketko ma·sichengbo. Political dolrang pilakan an·tangtangna kamrangko ka·enga aro chingaba apsankon dakenga. Chingaba gipin MLA-rangko ching dol baksa bakrimchina didienga aro ching baksa bakrimna miksongenggipa pilakkon rimchaksoenga,” ine Meghalaya TMC-ni dilgipa aganaha.
A·doko ku·mong nangrimaniko nangenga ine janapatengon, election-ni result-rangko parakatani ja·man ua pilak political dolrangkon bakrimatna jotton ka·ahachim indiba mitam dolrangko brena man·aha ine Sangma parakataha.
“Re·baenggipa salrango na·simang bang·en dingtanganirangko nikna sienga aro chinga ia sorkari baksa susana sienga. Chakchike sengkubo, chingko na·simang kam ka·gija donganiko nikjawa,” ine Sangma aganaha.
BJP baksa bakrimna manchianirang donga ine aganenggipako Trinamool Congress (TMC)-ni state president Charles Pyngrope-ba adita salrangna skangsan mamingkoba ma·sija ine parakatahachim.
