SHILLONG: Re·baenggipa 2024 bilsio Lok Sabha election-ko ong·atengani gimin dingtang dingtang a·dokrango National People’s Party (NPP)-ni tarisamsoanirangko nipilna gita Sombar salo NPP national committee-ni tom·bimonganiko New Delhi-o ong·atangaha.
Ia tom·aniko NPP-ni national president aro Meghalaya a·dokni Chief Minister Conrad K Sangma dilangaha aro ia tom·anio Assam, Arunachal Pradesh, Manipur, Mizoram, Chattisgarh, Jharkhand, Karnataka, Gujarat aro Uttar Pradesh a·dokrango donggipa NPP-ni membor-rangba bakko ra·angtokaha.
Ia tom·anio dingtang dingtang a·dokni dilgiparang, a·doktangtango NPP-ko mangrakbatatna kam ka·engani gimin talate on·angengon, re·baenggipa 2024 bilsini Lok Sabha election-na tarisamsoanirangkoba jinmana agan-talate on·angaha.
Ia bilsini gisepon Mizoram Assembly election-koba ong·atna siengani gimin ia election-na Mizoram a·doko NPP-ni gita tarisamsoanirangkoba Mizoram a·dokni dilgiparang, jinmana talate on·angaha.
Ia tom·anio dingtangmancha Meghalaya, Nagaland aro Manipur a·dokrango gital seokako man·gipa NPP-ni MLA-rangnaba mande ra·pilskaaniko dakangjolaha.
NPP national committee-ni tom·aniko ong·atanio adita sak dilgiparangkoba gital kamrango donatjolaha aro uamangara, NPP-ni national treasurer James K Sangma-ko national general secretary (organization) aro Arunachal Pradesh-ni in-charge-na, Meghalaya a·dokni Cabinet Minister Ampareen Lyngdoh-ko Manipur-ni state in-charge, Manipur-ni MLA M Rameshwar Singh, Meghalaya-ni MLA Ian Botham K Sangma aro NPP-ni dilgipa Sushil Huidrom-ko Arunachal Pradesh-ni co-in-charge aro Mizoram a·doko Assembly election baksa re·baenggipa bilsini Lok Sabha election-na kamrangko nirokna, Nagaland-ni MLA N Nyamnyei Konyak-ko Nagaland-ni state president aro Nagaland-ni da·o ong·enggipa president Dr Andrew Ahoto-ko national general secretary-na ong·aha.
