SHILLONG: Khasi Hills jolna Regional Planning & Development Council (RPDC)-ni chairman ong·e japrako gong lak 6 dormahako oke cha·a ine Hynniewtrep Youth Council (HYC)-ni a·kanganiko, National People’s Party (NPP)-ni ku·wattimgipa Bajop Pyngrope jegalataha.
Iani bidingo kobor ra·timgiparangna talataniko on·angengon, India a·songni President-an lak 5-mangni gita dormahakosan man·enga ong·ode maikai ua japrako gong lak 6 dormaharangko oke cha·na man·gen ine Bristibar salo, Pyngrope sing·doataha.
Regional party-rangonikoba bang·en political kamrango donatahaoba, uko aro GHADC-ni gitcham chief executive membor Rakesh Sangma-ni bimingkosan HYC mingahani gimin ian maiba dongnugipa miksongani dongna nanga ineba Pyngrope parakataha.
Uko Khasi Hills-na RPDC-ni chairman songanio Chief Minister, uo maiba gun dongako nikesa seokahakon ineba NPP-ni ku·wattimgipa parakataha.
Iani bidingo media-na parakatna skangba HYC-ni dilgiparang, badita tangkarangko koros ka·enga uko name sandichengna nangachim ineba Pyngrope parakataha.
Pyngrope-ni talataniko on·angani gitade, uni ning·o peon, driver, office assistant aro personal assistant-rangko seokanio uamang gimikni dormaharangko man·gopesa ua gong lak 6 tangkarangko okengachim.
“Ia kamrang dikdiksanasan ong·genchimoba anga uamangna kamrangko ka·e cha·na cholko on·na man·engani gimin kusi ong·a,” ine NPP-ni dilgipa aro KHADC-ni MDC Pyngrope parakataha.
Khasi Hills-na Bajop Pyngrope-ko aro Garo Hills-na Rakesh Sangma-ko RPDC-ni chairman songna gita nanga ja·kurangko de·china 2022 bilsini April 27 tariko, Meghalaya a·dokni Chief Minister Conrad K Sangma, Planning department-ni Commissioner & Secretary in-charge-na seataha ine adita salrangna skangsan, HYC-ni general secretary Roy Kupar Synrem parakatahachim.
2023 bilsini Assembly election-na skang RPDC-ko bon·atna skang, bilsisana Bajop Pyngrope, gong lak 6 ka·e dormahako oke ra·aha ineba Synrem parakatahachim.