SHILLONG: 1972 bilsini Job Reservation Policy-ko gital dake nipiltaichina dabienggipani bidingo chanchirimna gita a·dok sorkari, committee-ko songe on·angahaoba, Voice of the People’s Party (VPP)-ni president Ardent Miller Basaiawmoit, an·tangni okumu chake jingjengataniko dontongna jechakataha.
Mongolbar attamo, Additional Secretariat sambao donggipa parking lot-o jinmana aganprakangengon, reservation policy-ko gital dake nipiltaichina dabienggipani bidingo da·o sorkari aditade nom·e mesokaha ine Mawlai-ni VPP-ni MLA Brightstarwell Marbaniang parakataha.
Reservation policy-ko gital dake nipiltaiani bidingo chanchirimna gita sorkari, VPP-koba okamataha ine janapatengon, iani bidingo sorkari baksa chanchirimkuenga dipetde VPP-ni president, okumu chake jingjengatangkugen aro reservation policy-ko gital dake nipiltaina sorkari ku·rachakahaosa ua jingjengataniko dontonggen ine Marbaniang parakataha.
Sorkari baksa agangrikanio uamangni nangnikani gita ong·jaenga ine nikgenchimode uamang jingjengataniko dakangkuaigen ineba VPP MLA parakataha.
Reservation policy-ko gital dake nipiltaichina dabienba VPP-ni president, re·anggipa antini Mongolbar sal dipetan okumu chake jingjengatengachim ine nikna man·a.
Reservation policy-ni bidingo chanchirimna gita songako man·gipa committee, Budbar salo political dolrang baksa tom·aniko ong·atskaengachim.
