TURA/WILLIAMNAGAR: A·gilsak gimikon ta·makku jakkalaniko bon·atna gita miksonganio World No Tobacco Day-ko manitokengon, ia salko Garo Hills-ni dingtang dingtang biaprangoba, dingtang dingtang program-rangko ong·ate Budbar salo maniangaha.
Tura-o ia salko West Garo Hills a·jani National Health Mission-ni ning·o donggipa National Tobacco Control Program (NTCP), Tura-ni Super Market-o manidilangaha aro ia tom·anio West Garo Hills a·jani Additional Deputy Commissioner (ADC) AVD Shira, jinmana aganprakangengon, ta·makkuko jakkalani namgijanirangko jinmana agan-talate on·angaha. Ta·makkurangoni chel·e dongchina gita chadamberangko didiangengon, an·tangtangni janggi tanganio chu·sokgiparang ong·na man·na gita poraianirango gisik on·skachina gita ua chadamberangko didiangaha.
Meghalaya a·dokni gipin biaprango gitan East Garo Hills a·jaoba, ‘My Meghalaya, Tobacco-free Meghalaya’ ine pangchakaniko donenba, World No Tobacco Day-ko maniangaha.
Ia bilsio Meghalaya a·dok gimikon, ia World No Tobacco Day-ko maniani bak gita April 18 tarikonin a·bachenge, ta·makku jakkalaniko jegale aro manderangna ta·makku jakkalani namgijaniko u·iatna gita skulo poraienggipa chatro chatrirang re·jomaniko aro signature campaign-ko dakangaha aro apsan daken East Garo Hills a·jaoba chatro chatrirangni re·jomani aro signature campaign-ko dake ia salko maniangaha.
A·gilsak gimikon ia World No Tobacco Day-ko May-ni 31 tariko manironga aro ia bilsio NTCP Meghalaya aro Education department, Sambandh Health Foundation baksa nangrimenba, ia salko manisamsoani bak gita jagimikna skul ge·antion, ta·makku jakkalaniko jegale jinma re·jomani aro signature campaign-ko ong·atangaha.
Ia re·jomani aro signature campaign-ko a·dok gimikni dam 8000 skulrango poraienggipa sak lak 4.9 chatro chatrirang bakko ra·angtokaha aro manderangna ta·makku jakkalani bidingo mikrakatanirangko on·angaha.
Ia World No Tobacco Day-ko manianio East Garo Hills a·jani Deputy Commissioner Vibhor Aggarwal, jinmana aganprakengon, ia World No Tobacco Day 2023-ko maniani bak gita chatro chatrirangni re·jomani aro signature campaign-ko ong·ataniara mikkangchi an·seng baljokgipa chasongko rikna namgipa ja·ku de·chakatani ong·aha ine parakatenba, ia program-ko chu·sokgipa ong·atna gita rakbee kamrangko ka·ahani gimin DSEO, DMC, SDSEO, Nodal Officer, BMC-rang, BRP-rang, CRC-rang, skulni principal-rang aro skigiparangko mittelpilangaha.
Ia World No Tobacco Day-ko maniani bak gita dingtang dingtang susaanirangkoba gadangbri dake, chong·motan primary, upper primary, secondary aro higher secondary gadangrango ong·atangaha aro susaanirango chegiparangna boksis aro certificate-rangko on·angaha.
Ia susaanirangko ong·atanio block level-o chegiparang, district level-o susaanggen aro district level-o chegiparang state level-o susaangskagen.
East Garo Hills a·jani primary gadango Rev Oniram Memorial English School chegipa ong·aha, upper primary gadango Rongjeng Govt UP School chegipa ong·aha, secondary gadango Ferrando Memorial English School chegipa ong·aha aro higher secondary gadango Green Yard Secondary School chegipa ong·skaaha.
