TURA: Ia sal somoirango Garo Hills-o chaktopilgija ding·anirangko chakna nangtaiengahaon, West Garo Hills a·jani a·kawe jolo donggipa Phulbari jolrango bijolini voltage chu·ongsimjaengani gimin aro bijoli sisimsime manderang neng·nikanirangko chagrongna nangtokengani gimin iandakgipa neng·nikanirangko ta·raken namatchina Centre for Environment Protection & Rural Development (CEPARD), a·dokni Power Minister AT Mondal-ko didiataha.
“Phulbari jolrango salantian bijoli sisimsimengani a·sel aro bijoli donggenchimoba voltage chu·ongsimjani a·sel ia jolrango songdongenggipa manderang namen neng·nikanirangko chagrongna nangtokenga. Uni gimin chinga CEPARD dolni gita, ia jolrango songdongenggipa manderangni neng·nikaniko niatchina a·dokni Power Minister AT Mondal-ko mol·molenga. Ia jolrango ta·raken bijoliko chu·onga gita name on·china chinga mol·molenga,” ine CEPARD-ni dilgiparang parakataha.
Bijoliko name man·jaengani a·selan ia jolrango bading chiwalgiparang, poraienggipa bi·sarang, dingtang dingtang kamrangko ka·enggiparang chu·sokna gita man·jaenga ine janapatengon, ia jolrango songdongenggipa manderangni neng·nikaniko ta·raken niatna nangchongmotenga ine CEPARD parakataha.
Iandakgipa neng·nikanirangko namatna kam ka·anio pilak nanga dakchakanirangko on·na kusi ong·aigen ineba CEPARD, ku·rachakaniko on·ataha.
