SHILLONG: Meghalaya a·doko skigiparangoni 47 percent-de train ka·ako man·gijagiparangsa ong·kuengani gimin B.Ed college-rango seat-rangko bariatna aro admission ra·aniko batatna gita sorkari proposal-ko on·aha ine Bristibar salo, a·dokni Education Minister Rakkam A Sangma parakataha.
“Meghalaya a·doko 47 percent-ni gita skigiparangde train ka·ako man·gijagiparangsa ong·kuenga aro iani a·selba elementary level-o namgipa lekka poraniko on·na man·jaengakon,” ine Education Minister parakataha.
Education Minister-ni parakatani gitade, Tura aro Shillong-oba B.Ed college-rango biaprangko man·jaengani gimin bang·a chatro chatrirangan, West Bengal a·dokrangonaba re·ange B.Ed course-ko poraina nangenga.
Iani bidingo sorkari cholrangko nienga ine talataniko on·angengon, “Iani giminsa a·dokni B.Ed college-rango seat-rangko bariate, chatro chatrirangna biaprangko on·na gita sorkari, proposal-koba on·ahachim,” ine Sangma parakataha.
Gital B.Ed college-rangko kulina miksonganirang dongama ine sing·anina aganchakaniko on·angengon, gital B.Ed college-rangko kuliana bate da·o dongenggipa college-rangkon dal·batatna nangenga ine Education Minister parakataha.