SHILLONG: Meghalaya a·doko bobil dake chakatgipa dolrangni ong·katpiltaianiko champengna gita chadamberangko nambate nirokchina, pilaknan lekka porako on·china aro janggi tangani cholrangko on·china a·dokni Education Minister aro Rongara-Siju-ni MLA Rakkam A Sangma ku·pattianiko on·angaha.
Adita salrangna skang, Garo Hills-o GNLA bobil dol ong·kattaina jotton ka·enga ine kobor on·gipani gimin janapatengon, “Garo Hills-o bobil dake chakatgipa bang·bata manderangan bame on·tokahani gimin aro bang·batakon rim·na man·ahani gimin ian tol·e jangbingbanggipa kattasan ong·aiakon,” ine Sangma parakataha.
Sangma-ni parakatani gitade, ia sal somoirango bang·bata manderangan sorkarini kamrango kusi ong·engani gimin aro pilak biaprangon namroro silroroaniko nikna man·engahani gimin bobil dake chakatgipa dolrangni ong·kattaina jotton ka·enga inaniara tol·e jangbingbanggipa kattasan ong·aiachim.
Ia sal somoirango lekka porani gadangko tang·doatani aro namroro silroroaniko ra·baanian mongsonggipa daitorang ong·enga ineba ua aganaha.
“Manderang sorkarini kamo ba ma·a paani kamrango kusi ong·jahaode pangnan iandakgipa kamrangko ka·na chol ra·ronga. Uni gimin an·ching an·chingni chanchiani bewalko dingtangatna nangenga,” ine Rongara-Siju MLA aganaha.
Skango maming namroro silroroani dongjani a·selsa manderang bobil dake chakatgipa dolrangko bikotrongachim ine janapatengon, ia sal somoirango namroro silroroaniko nikna man·engahani gimin obostarang namen dingtangengaha ine Sangma parakataha.
Chadamberang skatangde silchidareko kejawachim ine janapatengon, iani gimin gimik jatnan aro nokdang ge·antinan lekka pora aro bida budiko nanga ine Education Minister parakataha.
Chadamberangna kal·susachakram biaprango aro bading chiwalani cholrangko on·na man·genchimode chadamberang skatang re·brangjawachim ineba Sangma parakataha.
