SHILLONG: Skangonin MeECL-o koros ong·ani aro kajina man·aniko dingtang dingtang sorkarirang namatchipna man·jahani gimin ia sal somoirango a·doko bijoli chu·ongjaengani gimin aro MeECL-ni gita man·enggipa obostarangna MDA 2.0 sorkarikode matnangna man·jawa ine United Democratic Party (UDP)-ni general secretary aro 2013-2018 bilsirango bijolini obostako am·sandina songgipa committee-ni gitcham chairman Jemino Mawthoh parakataha.
Mawthoh-ni talataniko on·angani gitade, 2014 bilsio uni MLA ong·engmiting somoio, a·doko bijoli chu·ongjaenganina ua jegalanirangko dakdilon, bijolini obostako name am·sandina gita uko chairman aro NPP-ni dilgipa James PK Sangma-ko secretary dake dingtangmancha committee-ko songe donangahachim.
“Ia committee, Leshka Umtrew, Umiam Stage 1,2,3 aro Umiam dam-koba man·chape a·doko bijoli bikotenggipa pilak biaprangkon nieaha aro uni ja·man maini a·sel Meghalaya a·doko bijoli chu·ongjaenga aro maikai power sector neng·nikanirangko chagrongna nangengachim, anga report-ko tarienba ua somoio a·dokni chief minister aro power minister-na on·angaha. Ia anga report-ko kan·dike taritaienba da·o sorkarina on·taigen,” ine Mawthoh parakataha.
Ia report-o committee-ni ku·pattie on·anggipa mingsade MeECL-ni koros ong·aniko komiatani aro kajina man·aniko bariatanian ong·achim ineba ua aganaha.
“Bijoli man·enggipa unit-praknan Meghalaya a·dok, gong 5 koros ong·e, gong 3-kosan man·pilenga ong·ode gong 2 noksan ong·enggipakora sawa gapatskagen? Ia noksan ong·aniko da·alona kingkingan dilgiparang saksaba namatna man·kujaenga,” ine UDP-ni general secretary talataniiko on·angaha.
Kajinako bariatgenchimode manderang, bijoliko chu·onga gita man·jaenga ine sorkarini kosako chakatna a·bachengskaaigen ine janapatengon, MeECL-ko chalaianio, bijoli cha·ue jakkalgiparang, kajina gamchipgijagiparang aro gipin a·selrangchiba neng·nikanirangko man·na nangenga ine Mawthoh parakataha.
Committee-ni report-o ming 12 ba ming 14 ku·pattianirangko on·ahachim ine gisik ra·atpilangengon, iani bidingo ua bakan power minister-ko gronge ia ku·pattianirangko on·angtaigen ine Mawthoh parakataha.
“Meghalaya a·doko nangchongmotgipa power sector-ko name chalaina gita an·ching pilakan ku·cholsan ong·na nangenga aro kajinarangko man·dapna nangenga,” ine ua aganaha.
