SHILLONG: Adita salrangna skang, Meghalaya All India Trinamool Congress (AITC)-ni dilgipa Dr Mukul Sangma, New Delhi-ona re·ange, ma·mongo BJP-ni dilgiparangko grongea ine agananiko Sombar salo, Meghalaya a·dokni BJP dilgiparang ku·rachakaha.
“Ma·mongo BJP-ni dilgiparangko ua grongna jotton ka·ani gnangchim aro ua ma·mongni dilgiparangko grongna Delhi-ona re·angaba re·angahachim indiba chingnade iani bidingo mamingkoba u·iatpila dongjaha,” ine Sombar salo, BJP-ni state president Ernest Mawrie parakataha.
Batanggimin somoirangonin TMC-ni MLA-rang, BJP baksa bakrimna jotton ka·enga ine jangbingbanganirangko knasona gita man·ahachim indiba iani bidingo dolgnini dilgiparangan mamingkoba parakujaengachim.
TMC parliamentary party-ni dilgipa Mukul Sangma, BJP-o napna miksonganirang dongenga ine koborrangko man·soani ja·man, Sangma Delhi-ona re·ange BJP-ni dilgiparangko grongeaha ine u·i-ma·sigipa manderangba parakatskaahachim.
Iani bidingo Mukul Sangma an·tangba jegalatani ja·man, TMC-ni state president aro Nongthymmai-ni TMC MLA Charles Pyngrope-ba da·o dipet TMC-ni MLA-rang, BJP baksa bakrimna miksonganirang dongja ine talataniko on·angahachim.
Mukul Sangma baksana sak 11 MLA-rang, 2021 bilsini November jao, Congress doloni ong·kate Mamata Banerjee-chi dilenggipa TMC-o napangskaahachim ine nikna man·a.
