SHILLONG: A·songna dangdike on·anio janggitangtangko gimaatna nanggipa a·song gimikni police-rangna Sombar salo, Meghalaya a·dokni Chief Minister Conrad K Sangma, New Delhi-ni Chanakyapuri-o donggipa National Police Memorial-o mande ra·pilskaaniko dakangaha.
Sianggipa police-rangna mande ra·pilskaaniko dakanio a·dokni Chief Minister baksana a·dokni Education Minister Rakkam A Sangma, Power Minister AT Mondal, a·dokni Director General of Police (DGP) LR Bishnoi, Chief Secretary DP Wahlang aro gipin official-rangba dongpae bak ra·angaha.
“New Delhi-ni National Police Memorial-o donggipa National Police Museum-ko niangaha. A·songtangna dangdike on·anio janggitangtangko gimaatna nanggipa an·chingni police-rangni gisik ra·na gita ia museum-ko kuliaha aro iano police-rangni itihasrangkoba tarie donaha,” ine National Police Museum-ko nieani ja·man a·dokni Chief Minister, social media-o parakataha.
