SHILLONG: Bilsiprakon sak 50,000-oni sak 60,000-mangona chadamberang kamrangko ka·e cha·na cholrangko sandiengani gimin indita sak chadamberangnade sorkarini kamrangko tikate on·na man·jawa ine Mongolbar salo, a·dokni Chief Minister Conrad K Sangma talataniko on·angaha.
Shillong songjinmani State Convention Centre-o World Environment Day-ko manianio a·dokni Chief Minister, jinmana aganprakatengon, bilsi 18-na skangoni see rakkianiko ma·sina man·ani gitade bilsiprakon sak 50,000-oni sak 60,000-mangona chadamberang, kamrango ka·na rimnapako man·enga aro indita sak chadamberangna sorkarini kamrangko tikataniara ong·na amgijani ong·engaha ine parakataha.
Bilsiprakon sak 80,000-oni laksa bi·sarang atchienga ine janapatskaengon, da·o bilsi 18 ba bilsi 20-ni ja·manode kam ka·e cha·na sandienggipa chadamberang bilsion sak 80,000-oni laksamang ong·skagnok ine Chief Minister parakataha.
Chadamberangna sorkari aro private company-rangsan kamrangko ka·e cha·na cholrangko on·na man·enga ine janapatengon, sorkarini dingtang dingtang department-rango bilsio ge 2000-oni ge 3000-ona kamrangko nakatate on·enga aro ia kamrangara adhoc, dingtang dingtang DSC-rang, MPSC, police, education aro medical board sector-rangoni ong·enga ine Chief Minister parakataha.
Bilsio sak 60,000 chadamberangnade sorkarini kamrangko tikate on·na man·jawa ine talataniko on·angengon, sorkarini department-rango ge 3000 kamrangkosan nakatate on·na man·engani gimin bangki sak 57,000 chadamberangde private company-rango kamrangko ka·e cha·na cholrangko sandiskana nangao ga·aka ine Chief Minister parakataha.
